Lider di MEP Evelyn Wever-Croes ta mira atras riba un campaña di yena formulario di belasting hopi exitoso. “Den e ultimo dos simannan nos a yuda mas di mil persona na nos sede. Un parti ta personanan cu ta bin cada aña pa nos yuda nan, nos clientenan fiel. Pero e aña aki tabata tin hopi cara nobo, di personanan cu pa prome biaha ta yega na nos sede, pa nos yuda nan. Esey ta un señal cu mas y mas hendenan ta haya confiansa den partido MEP. Mi ta gradici cada un cu a deposita nan confiansa den nos pa yuda nan” lider di MEP a indica.
EXPERIENCIA DI 27 AÑA DEN BELASTING
Sra. Evelyn Wever-Croes ta un experto di belasting, cu mas di 27 aña di experiencia den belasting, y desde cu el a drenta politica na 2009, el a organisa e campañanan di yenamento di formulario di belasting. “Tempo cu mi a traha na departamento di impuesto, mi a cuminsa cu e campaña pa yuda hende yena nan formulario di belasting. E tempo ey caba mi a realisa cuanto problema hendenan tabata tin cu yenamento di e formulario, y pesey nos a organisa e campaña pa yuda tur hende pa yen’e. Y mi mester bisa cu mi ta hopi orguyoso cu e hefenan despues di mi a continua cu e proyecto aki, pasobra e ta hopi importante. Mi tin awor 7 aña ta organisa esaki na nos sede di MEP pasobra mi a realisa cu tin hendenan cu tin mas problema cu solamente yena e formulario, y no tur ora nan ta haya oportunidad pa splica tur nan problema na departamento di belasting. Semper mi a gusta yuda hende, y awor cu mi por combina esaki cu mi area di experticio, sigur mi lo sigui hasi’e”.
PENSIONADONAN TIN HOPI PROBLEMA CU BELASTING
Locual ta resalta cada aña ta cuanto problema pensionadonan tin. “Mi tin hopi duele ora mi atende pensionadonan, pa mira cuanto problema nan ta haya nan aden. Hopi pensionado ta haya hopi cobransa bieu pareu debi cu departamento di belasting tin atrasonan. Pero di un pensioen e no por paga debenan di añanan anterior facilmente. Pesey nos mester elimina e atrasonan cu urgencia. Tambe e hecho cu e pensioen ta cumula, y e ora e belasting ta bira un tarifa hopi mas halto. Pesey nos mester elimina belasting riba pensioen di biehes, pa asiba baha e peso di belasting for di nos pensionadonan.
Tur e proposicion y solucionnan aki ta parti di nos programa di partido 2017-2021, cu nos lo publica pronto. E proposocionnan aki ta muestra cu MEP ta prepara pa enfrenta e retonan grandi di nos pais. Nos tin e vision y nos tin e experticio den cas pa logra esaki.