COLORADO, Merca – Sangura por contagia simultaneamente di e virus di Zika y esun di Chikungunya y potencialmente infecta sernan humano cu ambos enfermedad pareu, segun un estudio nobo presenta dialuna.
Den e investigacion, desaroya pa e Universidad Estatal di Colorado, cientificonan ap ermiti sanguranan alimenta di sanger cu tabata contene solamente dengue, zika y chikungunya of den algun caso, un combinacion di e virusnan.
“Nos tabata interesa pa mira si un virus por superpone cu e otro den e sangura. Es decir, si un sangur ta infecta cu dos virus, si un di nan ta suprimi e otro y solamente uno ta wordo transmiti,” e investigado Claudia Ruckert, kende a traha den e estudio, a splica EFE News.
Sin embargo, nos resultadonan ta indica cu esey no ta e caso y cu dos virus por infecta e sanguranan y despues wordo transmiti simultaneamente, el a agrega.
Ta desconoce ainda si por hiba tur tres virus simultaneamente.
Debi cu estudionan reciente ta mustra cu a existi pashent cu por lo menos dos di e enfermedadnan, cientificonan a propone pa descubri kico ta sosode cu e sanguranan den ambiente cu e virusnan aki ta circula cu hopi cercania.
Den futuro experimentonan, Ruckert tambe a observa infeccionnan secuencial, es decir, no simultaneo: no ta expone na un sangura na dos virus e mesun momento, sino cu algun dia di diferencia.
“Esaki por tin un resultado hopi diferente,” e investigado a señala, kende tambe ta propone pa wak con e virusnan aki ta evoluciona den sanguranan coinfecta den comparacion cu esunnan cu solamente ta porta un di e malesanan.
E presentacion, cu a tuma luga den un encuentro anual di e Sociedad Norteamericano di Medicina Tropical y Higiena na Atlanta (Georgia), tambe a conta cu un estudio realisa na noordoost di Brasil riba e problemanan neurologico haya den pashentnan cu e enfermedadnan aki durante e brote cu a sosode aña pasa.
E evidencia cu loke ta conta te cu wor aki ta mustra cu cada enfermedad por ta conecta cu diverso complicacion na nivel neurologico.
Entre nan, e investigadonan ta inclui dos caso di e extraño desorden yama Sindrome di Opsoclonus-mioclonus-ataxia, tambe conoci como e sindrome di e wowonan bailarin – pianan bailarin, nombra pa e movimentonan brusco y e contraccionnan cu e ta provoca.
Segun isadora Siqueira, un di e investigadornan Brasileño cu a participa den e trabao aki, “ta hopi dificil determina” si ta infecta cu dos di e virusnan aki, ta aumenta e riesgo di e problemanan neurologico.
Dengue, Zika y Chikungunya ta wordo transmiti pa e sangura “Aedes Aegypti.”
E virus di Zika, cu por genera keintura leve, rash, conjuntivitis y dolornan muscular, tambe ta hiba na e riesgo di malformacionnan congenito den muhenan na estado contagia.
Dengue ta comparti tambe dolornan muscular y rash, pero ta provoca un keintura hopi halto repentino y molestia den barica, sintomanan hopi parecido na Chikungunya.
Fuente: NTN24