Rotterdam, HULANDA- Riba peticion di autoridadnan Hulandes, e minister Turco a wordo saca for di su auto, bou di insulto y a wordo poni den otro auto pa hib’e bek pa Alemania. Ela wordo nenga permiso pa hiba palabra na su consulado, unda e lo kier a papia tocante e futuro referendum na Turkia. Segun testigonan, e minister Turco a nenga di baha for di auto blinda y na dado momento a yama un takelwagen pa touw e auto bay cun’e.
Gemeente di Rotterdam a hunga un rol grandi den declara e teritorio uno prohibi pa personanan cu lo kier causa desorden public. Alcalde Ahmed Aboutaleb a expande e ordo pa e centro di Rotterdam complete. Segun Aboutaleb, ariba rednan social ainda ta haci yamadonan na personana pa nan bay un concentracion den centro di ciudad. Tur orden di emergencia ta keda valido te diadomingo 8 or di mainta. Manifestantenan a tira obhetonan ariba polis. Door di esaki polisnan a saca e cañonnan di awa.
For di su auto, vigila door di tanto polis Hulandes, como polis Turco cu nummerplaat diplomatico, e minister Turco, Kaya a manda bisa via su cuenta di Twitter cu “Hulanda a viola tur ley internacional y tambe a viola derechonan humano door di no lagami drenta den e consulado Turco na Rotterdam”. Na mes momento el a wordo entrevista door di un canal di television di estado Turco, y a haci un yamado na Turconan na Hulanda pa nan rebeldia.
Esaki ta un serie di escalacionna diplomatico cu ta crece na cada momento. Turkia a informa cu e Embahado Hulandes, Kees van Rij, cu actualmente no ta na Turkia, “pa aworaki no mester regresa”. Embahada Hulandes y e consulado lo keda cera pa un tempo indefini. E residencia di Embahador na Ankara y di e Consul- General na Istanbul a wordo cera pa motibonan di siguridad, segun informenan di Ministerio di Relacionnan Exterior.