“Despues di un atardi informativo na SVGA (Stichting voor Verstandelijk Gehandicapten Aruba), nos a wordo informa di diferente hecho preocupante cu esnan cu limitacion ta pasando aden.” Esaki ta segun parlamentario Independiente y candidato riba lista di POR, Marisol Lopez-Tromp.
* Na e Centro di Cuido San Nicolas cu a wordo construi y ta destina pa nos grandinan y esnan severamente gehandicapt, te cu awe Gobierno di AVP no a percura pa esnan cu limitacion por haci uso di e cas y areanan terapeutico specialmente traha pa nan. E casnan tin casi 8 aña para bashi. Pues dos periodo completo di gobernacion sin cumpli cu esnan cu limitacion pa laga nan biba den casnan special pa nan.
* Tin un lista di espera di como 99 persona cu limitacion cu ta wardando un cas. Nan no ta capas pa bay protesta y pidi atencion dilanti bestuurskantoor. P’esey tin fundacionnan ta boga pa nan derecho.
* Pero e placa cu e fundacionnan tin pa haci nan trabou no ta yega y pa colmo Gobierno a pone nan corta den presupuesto. Y Gobierno no a aproba tampoco nan necesidad y deseo pa haya mas trahado cualifica pa traha na e fundacionnan aki.
* Tambe esnan cu limitacion tin añanan ta warda pa minister di infrastructura comberti un pida huurgrond cu nan tin den erfpacht cu e meta cu nan por traha riba ampliacion di casnan pa esnan cu limitacion. Nada te cu awe.
E moralidad di un pais ta wordo midi na con bo ta trata esnan mas vulnerabel den comunidad. Claramente e necesidadnan special aki no ta un prioridad pa e Gobierno actual.
Como minister antes mi a percura durante gobernacion pa traha casnan social pa esnan handicap por medio di FCCA na Santa Cruz y e Centro di Cuido na San Nicolas. Cu e Forsa Nobo den gobernacion sigur e prioridad lo wordo poni bek pa yuda esnan cu realmente tin mester di dje. Awor aki e necesidadnan basico di esnan cu limitacion ta wordo neglisha door di Gobierno. Esey por cambia y lo cambia pronto.