SCHEVENINGEN, Hulanda- E escritora Miep Diekmann a fayece diadomingo, 9 di Juli 2017, na Scheveningen, Hulanda. El a scirbi mas di 70 buki di mucha y teenager, pero tambe bukinan di informacion, poesia, trabaonan periodistico y bukinan cu ta bay tocante pinturanan di siglo 17.
Bukinan di Diekmans tabata bay mas bien tocante descubri e identidad propio y e crecemento pa bira adulto.
Su prome buki, Voltooid Verleden, a wordo publica na 1947 y tabata un buki tradicional pa mucha muhe. Despues a sigui e serie “Annejet”.
Pero su gran oportunidad tabata na 1956 cu e buki De boten van Brakkeput. E buki ta bay over di un mucha homber solitario cu ta biba na Corsou y ta carga un gran secreto. Su so lo mester busca manera pa yega na un solucion pa un problema grandi. E buki a wordo scogi como Buki di Mucha di aña, un premio cu tabata e preludio di Gouden Griffel.
Desde añanan 60 e tabata toca temanan mas dificil den su bukinan, manera discriminacion y politica. Na 1980 el a scirbi hunto cu e escritora di Chechenia, Dagmar Hilarova un buki tocante e recuerdonan di Hilarova di su estadia den e campo di concentracion Theresiënstadt. E buki, Ik heb geen naam (mi no tin nomber), a wordo premia cu e premio Polaco Janusz Korczak.
Gran parti di e bukinan di Diekmann ta tuma luga den “West- Indie”, manera e islanan di ex- Antiyas tabata wordo yama den añanan 30 pa 50 di siglo 20. Desde su 9 te cu su 14 aña Diekmann a biba na Corsou y e periodo ey tabata esencial den su bida futuro y su trabao.
Tambe Diekmann a scirbi cuentanan pa mucha, bukinan di informacion y bukinan pa personanan cu apenas tabata cuminsa lesa. Tambe el a traha como traductor, y coach di varios escritornan. Den ultimo añanan el a scirbi bukinan pa muchanan di peuter y di kleuter.
Varios biaha su trabao a wordo condecora cu premionan, entre otro e premio estatal Aleman (1964), Nederlandse Staatsprijs voor Kinder- en Jeugdliteratuur (1970) y tambe Nienke van Hichtumprijs (1975). Pa su buki Wiele Wiele Stap el a haya e Gouden Griffel na 1978.
Na 2006 Diekmann a wordo nombra como miembro honorario di e International Board on Books for Young People (IBBY), un premio nunca antes otorga na un Hulandes.
Fuente: www.nos.nl