WASHINGTON D.C., Merca – Un experiodista di television Mericano a acusa e expresidente Bill Clinton di mishi cun’e inapropiadamente na 1980, tempo cu e tabata gobernador di Arkansas (centro), den un video poni riba un website pro-Donald Trump, oranan prome cu e ultimo debate entre e candidato Republicano y e Democrata Hillary Clinton.
Leslie Millwee, kende e tempo ey tabata conoci como Leslie Derrick, a sigura cu Clinton a mishi cun’e tres biaha den un editing room di e cadena cu e tabata traha p’e.
“Mi tabata sinta riba un stoel, el a acercami di patras y a cuminsa massage mi lomba y a baha su mannan pa mi pechonan. Mi a keda sorprendi, paralisa. Mi a pidi’e pa e para, el a hari,” el a e exreportera a splica den un video poni riba e website conservador www.breitbart.com.
E otro dos biahanan, e exmandatario a bin riba dje, aunke cu el a pidi’e pa e stop, di acuerdo cu su testimonio.
Millwee a sigura cu Clinton, kende a Goberna Merca entre 1993 y 2001, tambe a bay wak’e na su cas.
E experiodista a manifesta di a duda den sali dilanti ora cu na 1998 a rementa e escandalo di Monica Lewinsky, e stagiaire cu a mantene un relacion cu e expresidente, pero a prefera di keda den anonimato pa proteha su yiunan, cu e tempo ey tabata hopi chikito.
“E medionan di comunicacion ainda no a exigi na e Clintonnan splicacion pa su comportamento y si esaki (su testimonio) ta influencia e medionan y e eleccion, mi ta celebr’e,” Millwee a señala.
“Mi ta convenci cu ami no ta e unico muhe kende a sufri e tipo di cosnan aki di parti di Bill Clinton,” el a agrega.
Den un buki publica na 2011, e exreportera solamente a conta e episodio cu Clinton a mishi cu su lomba, di acuerdo cu Breitbart.
“Mi no ta sorprende cu Donald Trump ta uza e informacion aki den e proximo dianan, nos ta spera pa e haci cualkier tipo di cos den e ultimo dianan aki” prome cu e eleccion dia 8 di November, e vocero di e candidato Democrata, Brian Fallon a declara na e cadena MSNBC.
Trump a ficha na Augustus e propietrio di Breitbart, Steve Bannon, pa convirti’e den director general di su campaña.
Fuente: NTN24