Ernest (Enty) Giel, no ta un persona desconoci den nos comunidad. E ta un Visitor Care Liaison na Aruba Tourism Authority, ya pa hopi aña caba y el a sa di cera amista cu hopi di nos turistanan.
Tambe e ta un carnavalista del Alma, cu net prome cu su fayecimento, tabata prepara pa bay den Los Laga Bai, publicando riba medionan social, con e ta prepara cu alma y curpa pa asina e bay disfruta di e celebracion magno aki.
Pero Papa Dios a dicidi otro. Den careda di 3’or di mainta, ambulance a bay cu urgencia na su cas, cu ta situa na Boegoeroei, caminda cu el a bira malo. Nan mester a subi na di dos piso pa asina nan cuminsa reanim’e, debi cu e no tabata halando rosea, pero si por a constata cu lo tabata trata di un posibel atake di curason. Dokter y ambulance a wordo yama pa asina duna un man pa por a bah’e abao.
Riba Facebook, por a nota mensahenan cu tabata expresa un shock, pasobra e tabata un persona cu asina hopi bida, cu nunca por a bin kere cu di un dia pa otro e por a bay, asina lihe.
Palabra di sentido pesame ta bay na su casa, yiu y nietonan. Na tur e resto di famia y tambe na su amistadnan, tanto aki na Aruba mes como den exterior.
Noord, en particular Boegoeroei, a perde un gran persona, un representante di Aruba pa esnan cu ta bin pasa nan vakantie aki. Un Nortero de pura sepa, cu semper a tene Aruba na pecho ya no tey mas. Enty, sigur nos lo bay sinti bo falta. Godspeed.