E dianan 19 di November pa 4 di December a tuma luga na Aruba e curso di IAAF CECS New Level 1 Course den e deporte di atletismo. Mester bisa cu durante tres siman largo e curso tabata bou di encargo di e IAAF Lecturers sr. Roy Thomas kende ta procedente di Jamaica mientras su persona ta un Course Director di profesion. El a wordo asisti pa IAAF Asst Lecturer den persona di sr. Rudolph Simon di Aruba. Un total di 13 cursista a inscribi pa sigui IAAF CECS New Level 1 Course cu tabata consisti di 12 les mainta y atardi.
E curso di nivel 1 ta riba nivel di beginners unda e ta yuda e entrenadornan compronde con pa entrena den e 21 disciplinanan di atletismo, pues no solamente e teoria pero pone esaki despues den practica. Pa loke ta e resultado final nos tin cu bisa cu Richard Luydens y Moraima Luydens a logra obtene nan diploma cu exito, ambos a pasa e tesis nan cu exito. Tanto Moriama como Richard ta traha cu atletanan den e edad di 9 – 14 aña. Na banda di esaki Richard Luydens a keda eligibel pa por sigui e curso di Nivel 2 mirando su resultado final cual ta dune e derecho di por aplica pa esaki.
Remarcabel ta cu despues di 10 aña e federacion di atletismo AAF a logra trece un international certify IAAF lecturer na Aruba y den sr. Thomas di Jamaica, nan a haya un di e mihonan den Caribe cu e wordo recomenda pa e federacion mundial esta IAAF. Un pabien na e federacion di atletismo, AAF y e cursistanan cu a sigui e curso IAAF CECS New Level 1 Course. Awor Aruba tin mas experto cu conocimento cu por traha cu nos atletanan den e deporte di atletismo.
Un danki sigur na Lotto, e Loteria di Aruba pa medio di Comision di Subsidio cu a subsidia e IAAF CECS New Level 1 Course den e deporte di atletismo.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.