Montevideo, URUGUAY- Diasabra e buskeda cu a sacudi Uruguay a finalisa: e buskeda di Felipe Romero di 10 aña, cu a wordo secuestra door di Fernando Sierra, un entrenado di e su club di futbol, cu kende e mucha tabata tin un relacion hopi cerca y tabata hasta yam’e “papa”.
E relacion tabata asina cerca cu e psicologo cu tabata tratando e menor, despues di a detecta comportamentonan straño den e mucha, a recomenda e mama pa e mucha stop di wak Sierra.
Diahuebs, sin permiso di e mama, Sierra a bay busca e mucha na scol. Esaki ta ultimo biaha cu ta tende di nan te cu diasabra, ora cu a haya e dos curpanan sin bida den un rieu na Montevideo.
Segun autoridadnan, Sierra a mata e mucha prome y despues a comete suicidio.
Sierra a conoce Felipe na 2015, door di e Club Defensor de Maldonado, e ekipo di baby futbol unda cu Sierra tabata entrenado y unda cu e chikito tabata milita. Aunke cu Sierra tabata tin Felipe pa poco tempo, nan a cuminsa un relacion hopi cercano.
Sierra tabata participa den reunionan di scol di Felipe, e tabata busk’e na scol y inclusive, el a biaha cu e mucha pa Brazil, cu permiso di ambos mayor. E tata a autorisa e biahe door cu inicialmente e idea tabata ta pa full e famia a biaha, dus, Felipe cu su mama, su ruman y Sierra.
E entrenado a bira e modelo paterno di Felipe, te ora cu despues di un di e biahenan ey cu nan a haci, un di e psicologonan a manda yama e mama. El a wak actitudnan straño den e mucha y el a conseha e mama pa no laga e mucha cerca di Sierra.
Segun e mama, Sierra a menasa di mata su mes si no e por ta cerca di Felipe. Diahuebs ela bay busca e mucha na scol, cual tabata algo cu e tabata haci normalmente.
E caso aki a conmociona Uruguay completo. Campañanan riba rednan social a cuminsa y amigonan di e famia a ofrece como boluntario pa participa den e buskeda di e menor, hunto cu polis.
Te ora cu e noticia a drenta, di cu a haya e curpanan sn bida di tanto Sierra como di Felipe.
Fuente: bbc