Diahuebs mainta un grupo di Polis a celebra cu 25 aña pasa nan a drenta servicio di e Cuerpo di Polis di Aruba, mientras cu un otro Polis a celebra su di 35 aña trahando como sirbido di pueblo y defensor di nos leynan.
Segun Alto Comisario mr. Adolfo “Dolfi” Richardson, esaki ta motibo pa celebra specialmente den un organisacion asina compleho manera ta Cuerpo Policial. “Semper mi gusta para keto na e ocasion aki mirando cu hopi hende ta cuminsa nan carera policial pero no ta alcansa un trayectorio asina largo. P’esey mi tabata contento y mi a mustra e coleganan riba e hecho aki cu no ta zomaar cu bo tin un carera asina largo den un organisacion como Cuerpo Policial”, asina Richardson a expresa.
Den ocasionnan asina Alto Comisario ta probecha pa haci un apelacion tambe mirando cu Cuerpo Policial Aruba ta un cuerpo hoben y specialmente na e dirigentenan pa sigui duna sosten y guia na e Polisnan hoben cu ta haciendo un tremendo trabao.
E hecho cu ta trata un di cuerpo hoben no ta nifica cu nan no ta un cuerpo dinamico y esey ta duna hopi posibilidad como un organisacion manera esaki, el a enfatisa.
E mainta aki un grupo di 8 Polis cu ta Lambrinos, Anthony – Peternella, Elton – Tromp, Jairo – Oduber, Gilbert – Raphaela, Marlon – Flounia, Rolf – Charles, Pearl cu a haya nan Landsbesluit pa 25 aña di dedicacion y Polis Nicolaas, Reginaldo cu a ricibi su decreto pa 35 aña di lealtad, locual ta un logro hopi grandi.