Willemstad Curacao: Djabièrnè 27 òktober 2017, den oranan di mainta polis a detené dos(2) hòmber sospechoso relashoná ku algun kaso di menasa ku arma di kandela, ladronisia(nan) ku violensia, enkubrimentu i violashon di e lei di arma di kandela ku a tuma lugá resientemente. Durante di un investigashon ku a tuma lugá na algun kas na Seru Grandi polis a haña i konfiská un kantidat di arma di kandela, munishon i algun otro artíkulo.
Awe, djabièrnè 27 òktober 2017 alrededor di 05.00 or di mainta, departamentu di Reshèrshi(veel voorkomende Criminaliteit), Tim di Aresto i Personal di Mantenshon di Òrden Públiko ku koperashon di korps Maniniers a hasi un entrada Hudisial na sinku(5) kas den e área di seru Grandi. E investigashon den e kaso(nan) ariba menshoná tabata andando i awe a kulminá den detenshon di dos(2) hòmber sospechoso:
1. M.A.Z. 19, aña di edat (ladronisia ku violensia, menasa ku arma di kandela i violashon di e lei di arma di kandela)
2. M.Z. 44, aña di edat (Ladronisia i enkubrimentu) Ámbos sospechoso ta nasé na Kòrsou.
Durante di un investigashon den e kas, polis a haña i konfiská:
Nuebe(9) rifel
Un kantidat di bala skèrpi di diferente kaliber(2 bala kaliber 22, 8 bala kaliber 32
largu, 46 bala kaliber 357 ‘Magnum Super Hollow Point’, 50 bala kaliber 380 “Win
Auto”
Un balansa
Dos(2)Paña di kamuflahe
Un(1) par di Sapatu di seguridat
Maskarada
Dos(2) motor di boto
‘trilplaat’
A presentá e sospechosonan dilanti di un Fiskal Ouksiliar ku a ordená nan enkarselamentu pendiente di mas investigashon.