Fin di siman presidente di Aruba Softball Bond, kende por cierto tin diferente posicion den Directivanan Internacional, a sali pa Florida Fort Lauderdale y despues pa sigui pa Tampa pa algun reunion ehecutivo cu dirigentenan mundial di e deporte di softball. Reunionnan tanto di ECASC ( English Caribbean Amateur Softball Confederation) y WBSCA esta World Baseball Softball Confederation Americas ( X- CONPASA) pa determina diferente plan cu mester wordo ehecuta den añanan nos dilanti.
Alabes a introduci un ranking system nobo pa WBSC (Softball Division). Por ehempel hasta den weganan di fogeo esta weganan amistoso entre seleccionnan di pais bo ta bin na remarca pa ricibi un porcentahe abou di punto. Esaki ta trece cun’e cu tur pais mester “meld” nan schedule di tur wega pa asina bin na remarca pa esaki y asina WBSC tin un miho control di unda tur e seleccionnan di cada pais ta moviendo ora no tin weganan internacional programa. Un otro punto importante pa cu 2017 ta e participacion di Gobierno di Republica Dominicana y su minister di Deporte kendenan a firma pa Republica Dominicana ta Cede pa ambos clasificatorio tanto Femenino y Masculino.
Pa seccion femenino e clasificatorio pa Juegos Centro Americano y Del Cariba y Pan Americano y Mundial Japon 2018 lo ta 3 pa 14 di Augustus mientras pa masculino clasificacion lo ta 14 pa 25 di September proximo. Republica Dominicana a inverti bastante placa den renobacion di su Villa Olympico haciendo esakinan ultramoderno pa ricibi delegacionnan di softball. Apart cu e cambernan tur ta cu airco a incorpora un Laundry, un medical center, Gym, seccion pa sauna, dining room cual tur ta nobo nobo. Tin hopi mas punto cual nos lo amplia riba nan mas despues.
Importante ta cu seleccion Femenino y Masculino di acuerdo cu Plan di ASB lo cuminsa cu entrenamento intensivo den luna di Februari y asina traha duro pa logra un “spot” den e 7 luganan available Augustus y September proximo y asina garantisa cu Aruba pa prome biaha den historia como Aruba lo participa cu un Teamsport den Juegos Centro Americano y Del Caribe cual lo tuma luga desde 20 di Juli 2018 na Baranquilla Colombia.
Endy ta termina mandando un mensahe na atletanan di pre seleccion “Ban lora manga di camisa y ban traha duro awor mas cu nunca cu hopi amor pa bo patria”. Seya un atleta orguyoso pa defende Bo bandera.