Parlamentario Endy Croes cada dia ta keda mas sorpresa pa e deficiencia di ex-minister Benny Sevinger den su capacidad. Ora Bo scucha un charlatan estafador di un pais Benny Sevinger papia durante conferencia di prensa y ora bo tuma nota di su contenido nos mester para keto un rato y pensa ta con tipo di hendenan asina a maneha Aruba durante e ultimo 8 añanan. Benny den cada conferencia di prensa bo ta gar’e ta gaña, anto masha facil. E pober no ta realisa su mes cu pueblo tin e door.
Gara ta horta y gaña
Siman pasa el a menciona sumanan incorecto cu boca grandi momento el a declara cu gastonan di ministernan tempo di AVP tabata 20 MIYON y di Coalicion actual ta 25 MIYON. Mientras cifranan oficial di departamento di finansas cu AVP tambe a haya durante tratamento di presupuesto 2018 a mustra cu gastonan di ministernan di e gobierno di Mike Eman y AVP di cual Benny a forma parti tabata 50 MIYON pa aña y di Coalicion actual ta 30 MIYON, esta un reduccion di 20 MIYON. Asina bo ta gara nan ta gaña mescos nos a gara nan ta “HORTA” e pais aki y ta na OM pa actua awor. Pues tristo pa un ex-minister ni sa cuanto tabata gastonan di su propio kantoor y di su gobierno. Claro e tabata demasiado ocupa cu negoshi estafando tereno di pais Aruba pa entre otro su amiga Leoncita di Canal 90.
Mas bobedad di Benny
Den mesun conferencia di prensa e charlatan estafador Benny Sevinger a bisa textualmente: “AVP a bay di un deficit di 9% pa 0.5% den 2017. Hulanda a bisa mi ta bay dunabo espacio pa yega na un deficit di -3% cual AVP a yega caba 3 aña pasa sin ningun medida”. Ora mi tende e charlatan estafador Benny papia bobedad asina mi ta puntra mi mes ta con estupido bo por ta? AVP a introduci 2% di BAZV, esaki no ta medida? AVP a aumenta edad di pensioen di 60 pa 65 aña, esaki no ta medida? AVP a tuma como 30 medida contra e pueblo aki banda cu nan a horta e pais aki na un manera cruel. Pa mi ta honesto mi a sinti tambe falta di prensa pa cuestiona Benny y hacie pregunta alcaso ora bo sa cu e ta gañando. Tin un di e miembronan di prensa cu semper ta “haantje de voorste”. E miembro di prensa aki conoci como e spreekbuis di Mike Eman tambe a sinta den conferencia di prensa di CAFT luna pasa y mester por a compronde kico a wordo splica. Raymond Gradus a splica cla y raspa cu gobierno anterior NO a haal e norma di 2017, esta un deficit di 0.5%!
Manipulado y tirado di para
E profesor di economia Raymond Gradus presidente di CAFT a splica na placa chikito cu e norma 2017 a keda “BUITEN BEREIK” y ta p’esey a duna e gobierno nobo espacio te cu 30 di April 2018 pa bin cu un presupuesto nobo y un plan pa cu un “herstelpad”. A splica cla cu e deficit total lo ta 3.1%, esta incluso e 0.5% di 2017 y pues tin un desviacion di 2.6% pa cu e norma 2017. Con por ta posibel cu Benny ta sinta gaña enfaticamente cu AVP a haal e norma di deficit di 0.5% di 2017 den conferencia di prensa y e miembro di prensa esta e spreekbuis di Mike Eman kende semper ta ple sabi a keda keto keto? E no tabata tin ni e decencia pa bisa Benny cu CAFT a caba di splica hustamente lo contrario? Finalisando Parlamentario Endy Croes ta splica cu Benny Sevinger no ta un persona integro y separa di ta un charlatan estafador e ta un persona manipulado y un tirado di para. Hendenan asina no mester ta den politica di e pais aki mas. Alaves nos ta haci apelacion na Ministerio Publico pa acelera e proceso den fraudenan di tereno pasobra Benny no por sali limpi di tur locual el a haci cu e pais aki.