Endy Croes (MEP): Awe AVP ta yora despues di a vota VOOR pa tur desaster

0

Parlamentario Endy Croes a splica cu tur dia mester evalua si ta reacciona riba e Parlamentarionan di AVP kendenan no ta ni yega trabao pero ta skirbi cantidad di barbaridad for di nan cas. Pa esaki pueblo ta pagabo? Boso no tin berguensa di cobra? Ata un Parlamentario femenino di AVP na yoramento diahuebs ultimo. Den boca di pueblo e Parlamentario aki tin e sintomanan di Tanta Sidonia di “Suske en Wiske” cual ta un señora masha amarga cu gusta keha. Segun dicho Parlamentario “Gobierno a scoge pa atraca nos ciudadanonan cu medidanan di aumento di BBO pa paga gastonan cu gobierno a aumenta di personal y goederen en diensten”.Kico por ta e credibilidad di Mervin Wyatt Ras awe ora e skirbi algo asina? Kico e kier gana? Kisas poco simpatia? E ta realmente kere cu pueblo ta bobo of analfabetico? E ta realmente kere cu e politica anticua di Mike Eman y AVP lo traha ainda? Pues manipula y gaña un pueblo pa keda na poder?

PRO bagamunderia
Laga nos corigi Mervin Wyatt Ras y splik’e atrobe pakico mester a bin cu e Crisis Heffing. Si bo a haci bo trabao na drechi y a controla Mike Eman y su Ministernan awe Aruba no lo ta pasando den e dolor aki. Mervin, Mike Eman a duna su amigonan entre otro di Tera Group, Paxi di Patrick Paskel y Canal 90 pa nombra algun, 89 MIYON na promocion cu placa di pueblo pa sinta gaba AVP y abo tabata grita VOOR. Mike Eman y AVP a paga pa deskundig advies un suma di 112 MIYON florin. Pues AVP no tabata tin 7 minister pero 9 minister y mas di 400 coordinador, anto ariba esaki mester a “horta” na un manera legal 112 MIYON pa conseho? Mervin, abo a grita VOOR y aproba tur e presupuestonan y fechorianan aki. Mike Eman a celebra 1 di september 2017 su cumpleaños riba e brug nobo na Spaans Lagoen y abo tabata t’ey. Bo a splica pueblo cu Financiën, esta Pueblo a paga Afl.142.000 riba un anochi di fiesta? Proyectonan PPP abo a vota VOOR pa tur sin cu tabata tin dekking pa nan. Pueblo awe a wordo presenta cu e cuenta y lo bay paga 20 aña largo 80.7 MIYON pa aña pa e maneho coruptivo aki.

Haci drechi
Mike Eman a grita den Parlamento cu e ta orguyoso di e debe y e debe t’ey pa nos tur bay pag’e den futuro. Abo a hari y a bati man y despues grita VOOR. Awe e cuenta a wordo presenta. Mike Eman cu bo sosten di parlamento a redobla e debe di Aruba. Pa recordabo, Raymond Knops Staatssecretaris a declara na television cu e debe di pais Aruba a crece den 8 aña di AVP di 40% te rond 90% y el a yama esaki “ZEER DRAMATISCH”. Mervin a logra wak e video aki of bo kier mi mand’e pabo? Awe Aruba ta pagando 216 MIYON na solamente interes di placanan cu AVP a presta pa fiesta cual ta igual na 600 mil florin pa cada dia. Tur esakinan Mervin a aproba gritando VOOR. Tristo ora mira con den bo articulo bo kier lansa mentira pa bruha pueblo. Esakinan ta algun di e rasonnan cu mester a introduci un crisis heffing di 1% di BAZV y 1.5% di BAVP pa por cuminsa paga bek y scapa nos florin. Pues ki ora cu Mervin pensa di bin cu un splicacion mentiroso y robez pa bruha pueblo nos lo sa di reacciona dunando e splicacion corecto cu puro berdad. Manera e hobennan ta bisa: “Haci Drechi”.

Comments

comments