Parlamentario Endy Croes a splica den conferencia di prensa dialuna ultimo cu el a regresa for di reunion di Parlatino cual a tuma luga na Havana, Cuba y ta su deber di duna cuenta na pueblo al respecto kico a wordo trata comokiera cu ta Parlamento ta paga pa e biahenan aki. Croes ta sigui splica cu e tema tabata riba topico di salud y tecnologia y ciencia pero alabes riba agenda tabata tin uso cannabis medicinal cual na ultimo ora a wordo kita for di e agenda. Lo haci mas estudio y tin rapportnan di diferente organisacion mundial cual lo wordo trata bek den luna di October momento cu tin mas informacion concreto. Parlamentarionan di Chile, Uruguay, Argentina, Ecuador, Bolivia, Mexico, Panama, Corsou, Aruba y representantenan di Cuba tabata presente. Directora di Ciencia, Innovacion y Tecnologia di Ministerio di Salud Publico di Cuba, Msc. Dra. Lleana Morales Suarez hunto cu Director di Bio Farma Cuba Dr. Rolando Perez Rodriguez a duna un presentacion hopi extenso di medicina di Cuba. Cuba ta enfoca hopi riba ciencia y medicina pa trata of cura entre otro cierto tiponan di cancer specifico. Banda di esaki tin un tratamento hopi bon pa patientnan diabetico primordialmente cu problemanan di herida etc. Sigur a regresa cu informacionnan di vital importancia unda lo pone Minister di Salubridad na altura y mira kico si Aruba lo por tuma over pa mehora calidad di bida di nos hendenan cu tratamento pa cierto tipo di enfermedadnan cu tratamentonan special cientificamente comproba. Di acuerdo cu cifranan cientifico cu un diagnostico corecto y tempran ta baha e mortalidad cu 33%. Asina a trata diferente tema di Salud y a ricibi presentacionnan interesante y importante y alabes a hiba debatenan interesante intercambiando ideanan, Parlamentario Endy Croes a finalisa bisando.