Durante su bishita di trabou na Aruba Minister Plenipotenciario señor Guillfred Besaril, hunto cu su colega Minister di Enseñansa señor Rudy Lampe y Departamento di Enseñansa a organisa un encuentro pa hobennan cu tin e intencion di bay studia na Hulanda. Mas cu 400 studiante hunto cu nan mayornan a presenta den e auditorio di Colegio EPI pa asina ricibi informacion di Arubahuis y di Departamento di Enseñansa tocante e periodo di preparacion prome cu nan estudio. Arubahuis a duna un presentacion extenso riba locual e studiantenan por spera na momento di yega Hulanda pa loke ta trata servicionan di Arubahuis.
Minister Plenipotenciario a habri e anochi informativo cu un saludo cordial na tur studiante y mayornan. E mandatario ta sumamente contento di a mira un cantidad grandi di studiante acompaña pa nan mayornan na e encuentro. Señor Besaril a comenta cu Arubahuis ta den e proceso pa haci e cambionan necesario den e organisacion pa por sirbi e studiantenan Arubano residencia na Hulanda mucho mas miho. A fortifica e forma den cual ta duna sosten y guia na e studiantenan door di entre otro amplia e team di mentoren y a facilita e proceso di contacto cu e departamento di studiantenan di Arubahuis.
James van der Linde di Arubahuis a informa e hobennan di e organisacionnan pa studiantenan Arubano na scolnan y universidadnan den e diferente ciudadnan na Hulanda. E organisacionnan aki ta organisa varios actividad pa ricibi e studiantenan pero tambe nan ta hopi activo durante e aña escolar. Sr. Van der Linde a recomenda tur studiante pa comunica cu e “studentenvereniging” di nan scol pa ta na altura di nan actividadnan di recepcion.
Departamento di enseñansa durante nan presentacion e anochi aki a recorda e studiantenan tocante e reglanan di Arubalening y e rekisitonan cu e studiantenan mester cumpli cun’e. Pa mas informacion tocante e deadline pa entrega documentonan di Arubalening of riba e recepcion di studiantenan na Hulanda por bay riba www.arubahuis.nl of www.ea.aw. Tambe por like e pagina di Facebook di Arubahuis y Departemento di Enseñansa pa keda informa di cualkier novedad.