BELGICA – Pa otronan, cu un empresa propone na su empleadonan pa pone den e organismo un “capsula” pa habri porta of accede na e computer, ta supone di ta un perdida di libertad y privacidad den un carera pa un sociedad unda tecnologia, e servicionan di Gobierno y empresanan, ta sirbi pa controla e ciudadanonan.
“Nos no ta “Big Brother” y nos no por rastrea nos empleadonan cu e chip (…). E ta solamente un manera mas facil pa habri porta y accede na bo computer. E ta completamente boluntario,” Tim Pauwels, socio director di NewFusion, a splica Efe News, cual ta un empresa Belga di software specialisa den marketing digital cu a implanta un chip den varios di su empleadonan.
E dispositivo, similar na loke ta wordo uza pa identifica mascotanan, ta consisti den un container di cristal poco mas grandi cu un pipita di aros cu tecnologia di identifica pa radiofrecuencia (RFDI) y un memoria di 868 bytes.
E chip aki por wordo adkiri na China cuminsando na 20 cent di Euro pa unidad, pero cualnan a scoge na NewFusion ta wordo fabrica na Merca, ta costa 100 Euro y ta bin cu un set di instalacion sterilisa. Un tatuador ta implant’e cu un hangua di e mesun caliber cu loke ta wordo emplea pa haci donacion di sanger. Ta sinti un hinca, ta wordo bisa, pero despues e dolor ta disparce y ta keda un marca chikito den cuero, aunke, den algun caso por distingui e implante den un forma chikito di protuberancia.
Fuente: El Universal