Den Haag –Embahadanan di Reino ta na servicio di tur cuater pais den Reino, pues tambe pa Aruba. Esakita bata e mensahe hopi cla cu Embahador di Reino na Republica Dominicana Robert de Leeuw a bisa durante di su bishita cerca Minister Plenipotenciario Juan David Yrausquin. Esaki ta encera tambe cu companianan di Aruba por haci uzo di e Embahadanan pa haci negoshi cu paisnan den region Caribense, den e caso aki Republica Dominicana. Minister Yrausquin den su combersacion cu Embahador De Leeuw a pidi atencion pa e asunto aki y tambe a menciona ATIA como un partner pa hiba combersacion cu nan.
Sr. De Leeuw a bisa di tin un aprecio grandi pa Prome Minister di Aruba Mike Eman pa su enfoke pa intensiva e contactonan den e region di Caribe.
E meta principal di e bishita di embahador De Leeuw na minister Yrausquin ta pa papia riba e bishita cu presidente di Republica Dominicana Danilo Medina lo haci e aña aki na Aruba. Durante di e bishita aki e delegacion Dominicana lo trata e posibilidad di exportacion di berdura y fruta for di Republica Dominicana pa Aruba. Minister Yrausquin a recomenda pa tene un reunion cu e importadornan di berdura y fruta na Aruba. Den esaki lo mester tene na cuenta e transportacion entre Republica Dominicana y Aruba, cual distancia ta hopi mas grandi cu entre Venezuela y Aruba,for di cual pais actualmente mayoria di berdura y fruta ta wordo importa na Aruba.
Tambe Embahador De Leeuw a menciona cu gobierno di Republica Dominicana ta hopi interesa den produccion di awa potabel. Segun Embahador De Leeuw Aruba lo por brinda Republica Dominicana sosten riba e tereno aki mirando su experticio. Minister Yrausquin a añadi cu Aruba pa medio di WEB tin un di e plantanan pa produci awa mas eficiente den region Caribense. WEB semper a produci awa y coriente na tarifanan conforme e mecanismo di e mercado, asina e mandatario a bisa.
Embahador De Leeuw mester a remarca cu e interes di companianan Hulandes pa inverti na Republica Dominicana no ta hopi grandi. Kisas esaki por cambia si e companianan haci uzo di Aruba como gateway pa Caribe, manera cu TNO a haci.
Finalmente Minister Plenipotenciario Juan David Yrausquin a bisa Embahador De Leeuw cu e por conta riba sosten di Aruba, principalmente di DBB y tambe di Gabinete di Aruba den coordinacion di e bishita di Presidente di Republica Dominicana Danilo Medina na Aruba.