Prome cu un letter wordo publica pa cualkier matutino di dialuna, un ciudadano consciente por anticipa cu lo tin diferente comunicadonan cu lo toca e aumento di criminalidad y insiguridad. E ciudadano consciente no mester di un scanner, un informante cu ta traha den prensa of un bola di cristal pa pronostica esaki. E ta un simpel cuestion di habri wowo, mira rond, realisa y admiti cu esaki ta e Aruba di awendia. Esaki ta e Aruba di ‘5 strea’ cu e gobierno actual a crea. Un Aruba di ‘5 strea’ unda criminalidad y insiguridad a bira e olifante den camber, pero cu ta gobierno so no ta mir’e. Segun varios declaracionnan publico di e minister di Husticia, e aumento di criminalidad y insiguridad no ta existi y cu esaki ta solamente un percepcion eroneo di un parti di pueblo. Pues cu otro palabra, pa e mandatario un parti di e pueblo ta exagerando, ta ciego of kisas hasta loco. Enbes cu gobierno scucha e grito di auxilio cu ta sali di e sociedad of admiti cu Aruba tin un problema serio y casi no manehabel mas di criminalidad y insiguridad, gobierno ta keda insisti cu criminalidad y insiguridad no ta un problema serio. Enbes cu gobierno admiti cu e criminalidad y insiguridad cu ta asotando Aruba feroz e ultimo añanan a wordo importa y hasta stimula a consecuencia di su maneho di entrega Aruba, su patrimonio y su pueblo na otro nacionalidadnan, gobierno ta prefera di sigui aplica su politica bieu y tradicional di ofrece pueblo proyecto. Awendia Aruba no ta nada diferente cu nos paisnan bisiña.
Pues kico pueblo tin cu haci cu tipo di politiconan asina? Politiconan cu enbes di sirbi e interes di pueblo, ta prefera pa sirbi e interes di otro nacionalidadnan. Politiconan cu ta legalisa tur sorto di ilegalidad of corupcion politico despues den parlamento, pasobra nan tin e mayoria. Politiconan cu a percura cu di cada florin, mas di 80 cen ta bay pa paga debenan di proyectonan cuestionabel y dudoso. Politiconan cu tin solamente wowo pa e ‘finder’s fee’ cu por wordo cobra, enbes di haci e pregunta si realmente pueblo tin beneficio di e proyecto ‘fastball’. Politiconan cu ta organisa tur sorto di mentira y ‘smoke screen’ pa laga un parti di pueblo ainda kere cu nan ta haciendo ‘un bon trabou’, mientras cu en realidad intencionalmente nan ta destruyendo e sociedad Arubano pa semper. Politiconan cu ta organisa shownan publico emocional, pa despues vota toch den bienestar di nan partido y no di esun di pueblo. Siman pasa, pueblo por a experencia un otro show asina durante e tratamento di e ley ‘All-inclusive’. Wel pueblo, prepara pa un show similar e siman aki cu ‘e amienda di geregistreerd partnerschap’, unda ya caba di antemano nos tur sa e resultado. Y esaki sin consulta un bola di cristal. Pues e pregunta cardinal ta, pakico pueblo tin cu sigui scucha y sostene politiconan asina cu a causa (y ta causando) hopi daño na e sociedad, mientras cu en realidad nan t’ey solamente pa sirbi nan propio interes y esun di e partido?
Nos lo ripiti cu e problema alarmante di criminalidad y insiguridad a wordo importa y cu nos gobierno ta prefera di practica e politica di avestruz sperando cu asina y hunto cu su politica bieu y gasta di tira pinda, e problema lo disparce. Tristo pa bisa esaki, pero nos di partido ABO ta kere fielmente cu si un dia un incidente similar manera a pasa recien cu un agente policial no local na Boneiro pasa na Aruba, un otro gay lo bay canta direct. Diripiente tur atencion y fondonan lo wordo duna pa combati criminalidad y insiguridad. Algo similar a pasa den pasado cu e caso di Natalee Holloway. Pero pa e Arubiano humilde cu ta wordo terorisa tur dia pa criminalidad y insiguridad, parce cu nos gobierno no tin oido. E postura discriminatorio aki di parti gobierno pa pueblo, por pone hende pensa: Mientras e minister di Husticia ta ronca, e comisario di Polis ta toca, pueblo ta wordo horca y abusa!
E decadencia social acelera cu pueblo ta mira e ultimo añanan, cu ta wordo caracterisa principalmente pa entre otro ladronicia publico y e aumento di criminalidad y insiguridad, mester wordo frena lihe. Esaki por wordo logra facilmente si e politiconan tradicional stop di practica corupcion politico, si nan fanaticonan bira un tiki menos hipocrita y si e resto di pueblo rechasa politica tradicional y exigi respet. Den e obra literario ‘La Divina Commedia (1308-1320)’ di Alighieri Dante, e estadista y poeta a ilustra entre otro cu corupcion politico y hipocresia publico, semper a conduci na deterioracion social. Den e obra di mas di 700 aña bieu, ya Dante tabata educa su pueblo contra e decadencia social:
‘La verita nulla menzogna frodi (No permiti ningun falsedad gaña di e berdad)’