E biaha aki e ‘replica’ di e ‘gran lider’ no a dura 100 aña, manera tabata su custumber cada biaha cu e la wordo bati y golpia politicamente. E biaha aki, esaki a bin di forma ‘relampago’. Ta asina dolor e retiro di e ex-minister di Turismo a haci? Atrobe pueblo por a experencia kico ta pasa cu un persona, momento cu e persona aki tin un opinion diferente cu e ‘gran lider’. Nos a mir’e na 2014 ora cu e ‘gran lider’ no a haya su kier cerca gobernador pa su presupuesto ficticio. Recien nos a bolbe mira e mal comportacion no digno, ora e ‘gran lider’ a ataca su propio minister plenipotenciario y su famia, pasobra e minister di San Nicolas a acepta e puesto di gobernador contra e orden di e ‘gran lider’. Awor ni un lealtad ciego of e ‘maramento na cadena’ ta spaar un fiel miembro di 27 aña pa e agresion di e ‘gran lider’.
Notabel tabata e ausencia di e ministernan di Infrastructura y esun di Salubridad durante e comedia di splicacion diabierna ultimo. Husto e dos ministernan aki, e ex-minister di Turismo a indica como esunnan cu a torpedia e maneho di Turismo cu nan ‘krabbeltje voor accoord’ pa duna un hotel 600 camber mas. Hopi straño, pasobra e ‘gran lider’ no ta bay ningun caminda sin su minister di Infrastructura. Biahenan pa Hulanda, Nacionnan Uni y hasta durante horcan ‘Matthew’, nan dos a bay firma e ley controversial ‘CITGO’ riba hood di auto na Zeewijk. Den boca di pueblo,nan ta manera ‘Jip en Janneke’. Pero na e comedia di splicacion, ‘Jip of Janneke’ tabata e gran ausente. Esaki ta e prome pista unda pueblo por mira cu e comedia di splicacion tabata tin tres meta.
E prome meta di e comedia di splicacion, tabata pa asesina e caracter di ex-minister di Turismo. Intencionalmente e ‘gran lider’ a pone enfasis riba con ningun otro minister por of kier a traha cu e ex-minister. Cuanto ‘esfuerso’ a wordo haci pa acomoda e ex-minister den e team di ministernan. Ki tipo di dictador e ta. Ningun costo of esfuerso no a wordo uza, pa pinta e ex-minister scur y como un burdugu. Pero alabes tur intento a wordo haci pa laga graba den mente di un parti di pueblo, e supremacia den liderazgo y con misericordioso e ‘gran lider’ tabata cu e ex-minister. Un shon di hende. E dos ministernan cu a firma pa e 600 camber, a wordo bisa pa no bin e comedia di splicacion pa di e forma aki nan lo no tin cu contesta ningun pregunta dificil cu por a kita e luz di camara for di e ‘gran lider’ of su mensahe di ‘character assassination’. Pero a pesar cu e comedia a wordo bon planea pa laga e dos actornan principal keda afo, esey no ta sconde cu e hecho cu atrobe un ley a wordo viola, pasobra algun mandatario a scoge pa un otro interes cu no ta esun di e bienestar general. Pa cual interes nan a scoge, pueblo no mag di haya sa.
E di dos meta di e comedia di splicacion, tabata pa habri e posibilidad pa crea un partido satelite di partido AVP. Pues crea un ‘ban cas bek’ partido pa tur esunnan cu ta rabia of decepciona cu e maneho di entreguismo y faboritismo di partido AVP. Na final e opcion ‘ban cas bek’ lo forma un coalicion cu partido AVP pasobra despues di 27 aña, e diferencia ideologico lo no ta mucho grandi y ambos tin e mesun ‘raiz y cuna’. Pa no lubida cu ambos tin e mesun patrocinadonan. Den pasado, pueblo por a mira algo similar tuma luga. Despues cu partido OLA a wordo malamente saca for di gobierno y un campaña di pinta otro scur a sigui, partidonan AVP y OLA a ‘kiss and make-up’ y a bolbe forma un gobierno nobo. Pasobra e interesnan di e patrocinadonan tabata mucho mas grandi cu esunnan di pueblo. Pero karma di bida a percura cu e manipulacion democratico aki no a dura mucho, y ‘e postema’ a rementa. Pues e ‘Blue is the New Green’ lo ta nada otro cu ‘oude wijn in nieuwe vaten’, pero sostene pa un mercadeo miyonario.
E di tres meta di e comedia di splicacion tabata pa kita atencion di e presupuesto 2017 y e abuso democratico di e presidencia di parlamento. Awendia e tempo pa studia, analisa y debati si un ley of maneho ta na interes di pueblo, ta wordo corta di un manera structural. Mas tempo wordo corta pa trata leynan of maneho, mas facil e ta pa sconde hopi informacion pa pueblo, pa asina e malgastamento di placa por sigui di forma ‘legal’. A pesar cu medida tras di medida a wordo poni riba lomba di pueblo, e debe nacional a sigui explota y hasta REDOBLA cu e ley ‘CITGO’. Pa e aña aki e debe nacional lo ta 83% BBP. Pues di cada florin 83 cen ta debe.
E ‘gran lider’ kier a kita atencion for di e tratamento di presupuesto 2017, cu su comedia di splicacion. Partido AVP mester por sigui gasta biyones na proyectonan di locura y sushamento wowo di un parti di pueblo, pa gana eleccion. Sin e ‘legalisacion’ pa sigui malgasta y enrikece e grupito preferencial, e campaña di corupcion y cumpra vota no por sigui. Partido AVP kier keda na poder pa asina sigura cu ningun puyito di corupcion sali for di e macutu. Hopi di nan cu a drenta cu 10 florin den nan saco pero cu awendia ta miyonario, no kier pa pueblo haya sa cuanto tereno, propiedad of placa nan tin aki na Aruba of den exterior. P’esey partido AVP lo haci tur cos posibel pa desvia e atencion di e tratamento di e presupuesto 2017 y su abuso democratico. A pesar cu e intencionnan di e ‘gran lider’ tabata pa desvia atencion y manipula pueblo cu su comedia di splicacion, e tabata hopi humilde di su parti, pa laga pueblo mira unda SI su placa ta wordo inverti. Pero ni cu su sala nobo di ‘glitter y glamour’ y por convence. Otro fracaso. Pobercito!