Eliminacion di corupcion, ta un di metanan principal di partido ABO. Pa algun hende esaki ta un meta no alcansabel, pasobra semper lo tin hende corupto y semper lo tin hende dispuesto pa mira e otro banda, tanten cu nan tambe haya algo di e corupcion. Partido ABO ta reconoce e realidad aki y cu tin hende cu ta pensa asina, pero esey no ta haci corupcion algo bon of sano. En su esencia, CORUPCION ta uzando LADRONICIA pa REEMPLASA ETICA y INTEGRIDAD cu DESMORALIDAD. Aceptando corupcion manera algo normal, lo nifica cu esun cu tin, semper lo ta mas cu esun cu no tin.
A pesar cu tur hende sa cu ladronicia y corupcion no ta bon, papia di of actua contra dje aki na Aruba, ta tabu! Dicon e tema ta asina tabu aki na Aruba? Dicon autoridadnan, no kier atende seriamente cu e tema aki na Aruba, manera ta sosode na otro paisnan y otro partinan di Reino? Ta pasobra cu kisas tin asina tanto ‘big fish’ meti aden, cu ta percura cu nada por wordo investiga? Ta pasobra cu kisas tin asina tanto intimidacion, cu poco hende ta tribi di papia di dje publicamente? Of porta cu kisas pueblo lo spanta si e wordo confronta cu e berdad? Cu e berguensa grandi, ora e wordo confronta cu con grandi e problema ta y ken tur ta meti den e HORTAMENTO SOCIAL.
Na Aruba nos conoce politiconan cu a drenta cu 10 florin den nan saco, pero cu awendia nan ta miyonario. Na Aruba nos conoce politiconan cu a wordo condena, pero awendia nan ta esunnan cu kier duna e ‘bon’ ehempel y un parti di pueblo ta acepta esaki. Pa no lubida di esunnan cu a ‘scapa’ (temporal) pasobra cierto investigacionnan a wordo haci di tal forma, cu penalmente nan a ‘ontspring de dans’. Parce cu na Aruba un parti di e pueblo a lubida riba asuntonan manera ‘Rapport Koerten’, ‘Plantation Bay Hotel’, matanan di coco di ‘Radisson Hotel’, ‘Srs. Rincon y Carvajal’, ‘WEB-Hedging’, ‘Black Corridor’ y e chapaleta cu a disparce for di waf. Tur esakinan a termina den e famoso ‘doofpot’, pasobra tin hende ‘niet zo maar iemand’ envolvi.
Aruba a wordo poni diferente biaha riba un ‘Black list’, pasobra algun hende tabata sirbi nan propio interes mas, enbes di e interes general. Varios biaha Aruba su nomber a wordo lastra mundialmente den asuntonan di labamento di placa, pa via di un grupito privilegia. Pues suficiente ehempel cu ta ilustra cu corupcion a sali for di man aki na Aruba y cu e no a beneficia Aruba di ningun manera.
Aruba no mester di ningun dia internacional, manera 9 december, pa pone atencion riba corupcion. Tampoco Aruba mester di mas ‘experto of rapport’, pa bisa con serio e situacion di corupcion ta. Tur hende por mir’e y tur hende sa cu e ta serio. Aruba por sanea su mes y Aruba por frena e plaga di corupcion, prome cu e dañonan bira irevocabel. Ainda e mayoria di e pueblo Arubano ta culto, integro y sa ki ora e tin cu haci lo CORRECTO!
Algun sugerencianan pa cuminsa frena e plaga di corupcion y enrikecimento personal:
Introduci un ley special pa combati CORUPCION Y SOBORNO cu sancionnan hopi pisa. Esaki lo pone un hende cu intencionnan malo pensa dos biaha prome e comete e delito;
Regla den e ley CORUPCION Y SOBORNO, cu tur locual un funcionario publico haya di forma ilegal, lo wordo kita di dje y si ta trata di hortamento di fondonan publico, cu e lo tin cu paga full e suma bek, cu interes. No ta importa si e lo dura 100 aña;
Regla den e ley CORUPCION Y SOBORNO, cu un persona cu comete un delito asina, no por ocupa of eherce un funcion publico mas, pa un cierto tempo;
Regla den e ley CORUPCION Y SOBORNO, cu lo publica nomber di esun cu comete un delito. Asina henter comunidad lo sa kende a enrikece su mes riba pueblo su custia;
Haci obligatorio pa tur funcionario publico den posicionnan halto (minister, parlamentario, director etc.) declara anualmente kico nan tin na entrada y pertenencia;
Publica nomber y e compensacion di tur comisario den companianan estatal y publica anualmente e relatonan di maneho y financiero di companianan estatal;
Percura pa no tin e mesun personanan, ocupando diferente puesto di comisario den companianan estatal;
Adapta e ley FINANCIAMENTO DI PARTIDONAN POLITICO, cu mas control y sancionnan severo y percura cu esaki wordo implementa prome cu eleccion y no despues;
Cuminsa exigi di partidonan politico un splicacion di unda nan ta haya e fondonan pa hiba nan campañanan miyonario prome cu eleccion;
STOP di glorifica politiconan. STOP di lubida cua politico a causa hopi daño na e pais aki. STOP di no mira cua politico a bira miyonario riba pueblo su lomba. STOP di vota pa ‘COS’.