Siman pasa un otro ‘CITGO-deal’ show a wordo organisa pa conmemora e cumpleaño di nos prome minister. Y locual a bira custumber, algun miembro di parlamento a cuminsa fiesta manera esaki ta e deal cu lo saca Aruba for di e abismo financiero y social cu nan mes a percura pa hinca Aruba aden. Atrobe di fiesta sin cu nan a ricibi e ‘CITGO-deal’ di parti di gobierno. Pero bon, manera nan ta prefera fiesta enbes di traha, laga nos di partido ABO haci nan trabou y informa pueblo kico ta para den e un parti di e ‘CITGO-deal) y asina trata di evita cu e politico tradicional lo pasa pueblo un ‘fastball’ atrobe, cu e storia cu esaki ta e ‘deal’ di siglo mientras en realidad e ta un cabay di troya.
Den e ‘Definitive Participation Agreement (Execution version) By and between the Public Legal Entity Land Aruba, CITGO Aruba Holding, LLC, CITGO Aruba Refining N.V. (CAR) and CITGO Aruba Terminal N.V. (CAT), riba pagina 2 tin skirbi: ‘Investor together with CAR and CAT and the other Investor Parties are willing to participate in and fund the rehabilitation of the Refinery…and the Government desires to allow, facilitate and guarantee such participation and, in recognition of the investments Investor will have to make, to grant certain incentives, protections, benefits and exemptions to Investor and other Investor Parties in conection therewith’.
Mientras cu den section 12.1 (a): ‘the Government guarantees the Investor Parties the stability of the terms and conditions of this Agreement and the Implementing Agreements as well as the fiscal and contractual framework hereof..’
Pues locual nos por mira akinan, cu gobierno a firma un otro deal pa duna e inversionistanan tur sorto di areglo fiscal y garantia, sin un dia e la consulta of cu e la haya aprobacion di parlamento. Es mas e ta hasta garantisa un clima stabiel durante e periodo di implementacion di e acuerdo. Cu Aruba ta bancarota, cu e ta bou curatela financiero di Hulanda y di cada florin mas di 80 cen ta bay pa paga debe y interes, anto con gobierno por garantisa un clima stabiel pa minimal 4 aña. Tambe e lo ta interesante pa gobierno splica ki tipo di garantianan y exoneracionnan ta wordo papia aki, cuanto esakinan lo costa pueblo, cuanto riesgo pueblo lo core y kendenan ta e ‘Other Investors Parties’?
Pa tur esunnan cu ta kere cu e ‘mehorador’ lo habri pronto y cu e efecto laboral y financiero lo por wordo mira y sinti, den e ‘CITGO-deal’ ta poni bon cla cu esaki lo dura kisas 4 aña. Section 5.1 (b) (i): ‘CAR is obligated to finalize the Rehabilitation Project within a period of no more than four (4) years after the Effective Date’.
Cuatro aña ta un periodo hopi largo y hasta e ‘International Monetary Fund (IMF)’ ta indica cu e pronosticonan economico no ta mucho bon y ainda tin hopi incertidumbre y inkietud mundial. Esaki ta haci mas cuestionabel cu gobierno por a firma un contract cu ta garantisa un clima stabiel durante e periodo un periodo di 4 aña. Gobierno a demostra cu e mes no por crea un clima stabiel financiero aki na Aruba of cu e por cumpli cu palabracionnan, manera e la haci cu Hulanda y CAft.
Locual ta interesante pa pueblo sa, cu awor despues cu gobierno a firma pa para garantia pa tur cos, awor ta cu e garantianan aki e inversionistanan ta bay busca financiamento pa ehecuta e proyecto ‘mehorador’, section 12.10 (c) (ii): ‘Considering that it is in the public interest to support the Investor’s ability to obtain financing for the benefit of the rehabilitation and operation of the Installations and Marine Assets, at the request of the Investor Parties, the Governments Parties will cooperate with the Investors Parties to negotiate and enter into or deliver such amendments to this Agreements and other agreements..as are necessary to facilitate the Investor’s Parties’ ability to obtain Project Financing..’
Tambe ta bon pa pueblo sa, cu gobierno a firma cu e mester coopera y cu e no mag di obstaculisa esunnan cu lo fia e ‘mehorador’ placa, si algo no sigui manera palabra, pa haya nan placa bek, section 12.10 (c) (iii): ‘The Government Parties will agree not to obstruct the Project Lenders’ enforcement of their security interest, including their excersise of their step-in and substitution rights in connection with the Investors Parties’ breach of their agreement with the Government Parties.
Lesando tur esaki den e ‘CITGO-deal’, nos no por yega na un otro conclusion cu ainda ta hopi prematuro pa celebra algo. E unico cos sigur cu ta sali di e ‘CITGO-deal’, ta cu gobierno a condena pueblo pa paga miyones atrobe na daño di perhuicio, manera a pasa den e proyecto ‘Race track’, si e ‘CITGO-deal’ no continua. Algo cu tambe ta sigur den e ‘CITGO-deal’, ta cu algun hende lo cobra un balente ‘finder’s fee’ ora e ‘Investor’s Parties’ obtain Project Financing’, manera tambe a pasa den e proyecto ‘Black Corridor’. Den e dianan siguiente nos lo keda informa pueblo mas riba e ‘CITGO-deal’ di hopi pagina. Pero ya caba nos por informa cu e mesun preguntanan cu a wordo haci e tempo ey, despues cu Aruba a wordo condena paga miyones na daño di perhuicio pa e proyecto ‘Race track’, tambe ta valido. Pues si Aruba tin cu para garantia pa tur cos atrobe, dicon semper ta otronan so, ta bira miyonario? Un otro interesante observacion ta, cu algun di e protagonista principal di e proyecto ‘Race track’ atrobe ta envolvi, solamente e biaha aki uno ta den gobierno mientras e otro ta den parlamento. Pues e aventura CITGO ta un otro proyecto ‘Race track’ of ta puro casualidad? Ban spera cu no.