LONDON, Inglatera – E musico pop Britanico, Elton John, ta recuperando tras di sufri un infeccion “potencialmente mortal” cu el a haya despues di a caba cu un gira na Sur America, tabata interna dos dia den intensive care y mester a cancela conciertonan na Merca, su relacionista publico a revela dialuna.
E cantante a descompone “di forma violento” durante e vuelo cu a sali for di Santiago de Chile, dia 10 di April, ora cu el a caba cu e gira, su representante Murray Chalmers a agrega den un comunicado. Ora cu el a baha na Gran Britania, el a wordo hiba inmediatamente pa un hospital, unda cu el a wordo someti na un tratamento pa “un peligroso y inhabitual infeccion bacteriano”, e fuente a precisa.
“Despues di a keda dos anochi den intensive care, sigui pa un internacion prolonga den e hospital, Elton por a bay cas diasabra, dia 22 di April y awo ta descansa comodamente na su cas, siguiendo e recomendacio di su dokternan.” Chalmers a agrega, ademas cu “e infeccionan di e naturalesa aki ta poco frecuente y potencialmente mortal.”
Ta spera cu e streya di pop di 70 aña logra recupera por completo tras e infeccion haya durante e gira den seis etapa, durante cual el a bishita ademas di Chile, Brasil y Argentina. E enfermedad aki, cu a oblig’e cancela su proximo conciertonan na Merca, premira na Las Vegas y Bakersfield, lo bolbe bek riba escenario na London, dia 3 di Juni.
“Mi tin suerte pa tin siguidornan mas increibel y fiel cu ta existi y mi ta pidi disculpa pa decepciona nan. Mi ta hopi gradicido na e ekipo di dokter pa nan excelencia na e momento di atende mi,” Elton John a bisa, un idolo cu un carera di cinco decada. E musico a ricibi inumerabel reconocimento, tras di realisa mas di 3500 concierto y bende mas di 250 miyon di album rond mundo.
Fuente: El Espectador