Ta purba di haci Aruba limpi y mantene esaki limpi tambe. Ainda tin hopi hende ta kere cu pafo di auto, y pafo di nan cas, ta un dump. Sr. Roy Maduro ta amplia. Algo sumamente positivo ta e eliminacion di saconan di supermercado, aunke no tin sancion pa si un supermercado trece e saconan aki bek den circulacion. Esaki ta un peliger grandi, mescos cu e ley di cacho cu a pasa, pero cu no tin sancion si bay contra di e ley aki.
Sr. Maduro ta spera cu hendenan lo sigui, y cu e comunidad realisa con importante e ta pa tene nos isla limpi, pa nos mes na prome luga pero tambe pa e turistanan cu bin Aruba. Semper lo haya e hendenan di exterior cu lo gaba e limpiesa di nos isla.
Aunke ainda tin hopi sushi, pero mester tene nos isla limpi, pasobra mas hende ta bin establece akinan y mas hende ta ocupa e isla, mas cas y menos tereno pa diberti, menos luga habri y e ora ey e druk ariba e limpiesa di Aruba ta bira hopi mas grandi.
Sr. Roy Maduro a trece un mensahe pa e comunidad pa no tira sushi riba caya, ni den cura. Hopi sushi di cas nos mes por reciclanan. E comunidad mester ta mas consciente, cu ta pica cu antes ECOtech tabata separa, pero desde cu a stop cu esaki, nunca mas e comunidad di Aruba lo siña di separa nan sushinan. Y ta den e direccion aki mester bay, segun Sr. Roy Maduro di AHATA.