LONDON, Inglatera – E votantenan Britanico ta propina un duro golpi na e prome minister di Reino Uni, Theresa May, den e eleccionnan cual el a convoca pa fortalece su posicion den e negociacionnan riba Brexit, pero cu a caba den reduci su mayoria parlamentario y a hinca e pais den agitacion politico.
Sin un ganado claro, tras di e eleccionnan Parlamentario di diahuebs, un May herida a indica cu e lo sigui lucha. Su rival laborista, Jeremy Corbyn, a opina cu e mester renuncia.
Despues di un di e anochinan mas agita den historia electoral Britanico, politico y comentaristanan a describi su decision di celebra e eleccion anticipa como un eror colosal y a ridiculisa su actuacion den e campaña electoral.
BBC a reporta, sin embargo, cu May no tin planea pa renuncia.
“Theresa May no tin intencion di anuncia su renuncia mas laat durante dia,” e editora politico di BBC, Laura Kuensserg a bisa. “No ta claro pami si e ta purbando di calma e rumornan prome cu realmente e tuma un decision,” el a agrega.
Cu 647 di 650 votacionnan scrutina, e conservadornan ta obtene 316 diputado. Apesar di ta e mayor ganadornan, nan no a logra alcansa e marca di 326 asiento cu nan tabata tin mester pa un mayoria absoluto. E Partido Laborista a keda cu solamente 261 asiento.
Faltando solamente 10 dia pa cuminsa cu e negociacionnan compleho pa e salida di Gran Britania di Union ‘Europeo, a genera incertidumbre riba kende lo forma e Gobierno nobo y cual lo ta e direccion cu e Brexit lo tuma.
“Na e momentonan aki, mas cu cualkier otro cos, e pais aki tin mester di un periodo di stabilidad,” May a bisa cu un rostro sombrio, tras di gana su votacion na Maidenhead na zuidoost di Inglatera.
Tras di obtene su victoria na nort di London, Corbyn a bisa cu e intento di May di haya un mandato mas cla, a backfire den su contra. “Loke el a haya tabata un perdida di voto conservador, un perdida di apoyo y un perdida di confianza.”
Desde e perspectiva di Union Europeo, e agitacion na London ta nifica un posibel retraso den e inicio di e negociacionnan y un mayor riesgo pa e fracasa.
“Nos tin mester di un Gobierno cu por actua,” e comisario di e Presupuesto di Union Europeo, Gunther Oettinger a declara na e cadena Aleman Deutschlandfunk. “Cu un socio negociador debil, ta existi e riesgo cu e negociacionnan resulta malo pa ambos parti,” el a agrega.
E parlamentario conservador, Anna Soubry tabata e prome den e partido cu a renega di May den publico y a pidi e prome minister pa considera su posicion. “Mi tin miedo cu nos a haci un campaña bastante teribel,” Soubry a manifesta.
May a convoca eleccionnan anticipa shete siman atras, confiando cu e lo incrementa e mayoria parlamentario cu el a hereda di su predecesor David Cameron, den e antesala di cuminsa cu e discusionnan riba Brexit.
Den cambio, e resultado a pone na riesgo di un salida ignominioso di 10 di Caya Downing, pues e lo por converti den e hefe di Gobierno Britanico cu e mandato mas cortico den casi un siglo.
Fuente: http://lta.reuters.com