MARAWI, Filipinas- Ehercito Filipino for di prome dia di bataya, ya caba a recupera 90% di e poblacion for di e garanan di ISIS y ta purba na likida “gruponan chikito di resistencia” cubriendo nan mes tras di un grupo no determina di civilnan.
Sinembargo, e confrontacion aki ya caba a costa bida di 58 persona. Diabierna ultimo, al menos 13 soldaat Filipino a perde nan bida y 40 mas a resulta herida durante enfrentamentonan cu’n grupo yihadista simpatisante di ISIS, scondi den un ciudad na sur di Filipinas.
Den declaracionnan na EFE, gruponan di asistencia civil y representante di Crus Cora a sigura cu e cantidad di civilnan cu a perde nan bida den e enfrentamentonan, por surpasa 100 ya cu no ta existi cifranan oficial door cu no tin acceso pa varios zona di e poblacion.
E combatenan a cumisna di 23 di Mei, ora cu un operacion militar pa caputra Isnilon Hapilon, lider di e grupo yihadista Abu Sayyaf, cu tambe ta vincula cu ISIS. Hapilon tabata scondi door di miembronan di e grupo Maute.
Sin embargo, segun fuentenan gubernamental, e asalto riba Marawi kisas lo a wordo planea di antemano door di e gran cantidad di suministro cu segun informenan, e grupo arma lo tin.
Soldaatnan ta actua bou proteccion di ley marcial, declara pa presidente Rodrigo Duterte den full e region di Mindanao, for di e mesun dia cu e conflicto a cuminsa.