PHILIPSBURG – Pa delaster biaha Sr. Age Bakker, como presidente di Colegio di supervision financiero di Corsou y Sint Maarten (Cft), a papia cu Conseho di Ministro y cu e miembronan di Parlamento tocante finansa di Sint Maarten. Falta nocion tocante e estado financiero actual a consecuencia di problema cu Tecnologia di Informacion (IT) den e administracion financiero. E cuenta anual di 2016 no ta elabora ainda, loke ta nifica cu ainda ta existi insiguridad tocante e resultado positivo spera di ANG 26,4 miyon. Ademas te ainda no a presenta na Cft un reportahe di ehecucion di 2017. Accion inmediato di parti di gobierno ta imprescindibel, pa por confia cu Sint Maarten ainda ta cumpli cu e exigencianan di e instruccion dirigi.
Basa riba e reportahe di ehecucion provisional di e di cuater kwartaal, Sint Maarten ta spera un surplus presupuestario di ANG 26,4 miyon na 2016. E surplus aki lo por ta suficiente pa compensa segun e plan e deficitnan acumula durante e añanan anterior. Cft a enfatisa cu Sint Maarten lo mester elabora e cuenta anual di 2016 rapidamente y laga accountant control’e. Na e momentonan aki tin cifra provisorio disponibel, pero pa motibo di e problemanan coriente di IT ta bon posibel cu nan ta susceptibel na cambio. E cuenta anual lo mester duna mas siguridad tocante e resultado di 2016. “Ta importante pa Gobierno di Sint Maarten tuma accion inmediato pa suministra e informacion necesario tocante ehecucion di e presupuesto”, Age Bakker a declara durante e encuentro cu Conseho di Ministro.
Den su conseho tocante e presupuesto di 2017 Cft a conclui cu e presupuesto tabata di conformidad cu e instruccion dirigi. Sinembargo, Cft a enfatisa cu tambe ta importante pa monitorea e presupuesto cuidadosamente, pasobra e presupuesto ta fuertemente dependiente di entrada incidental. Pa motibo di e problemanan di IT, Sint Maarten no por a suministra tampoco e reportahe di ehecucion di e prome kwartaal di 2017. Sin e reportahenan di cada kwartaal ni Gobierno di Sint Maarten ni Cft no por controla suficientemente si di berdad a realisa e ingresonan. P’esey ta dificil pa evalua si ehecucion di e presupuesto ta di conformidad cu e instruccion dirigi. Esaki tin consecuencia tambe pa por contesta e pregunta si Cft lo por aproba un futuro peticion pa prestamo.
A ricibi un peticion pa un prestamo di ANG 30,0 miyon pa inversion di capital dia 12 di april y entretanto Cft a aprob’e. ANG 21,6 miyon di e suma pidi ya tabata incorpora den e presupuesto, kiermen cu mester incorpora formalmente ainda ANG 8,4 miyon den e presupuesto pa medio di un modificacion di presupuesto. En bista cu un modificacion di presupuesto ta un proceso cu ta dura largo, Gobierno di Sint Maarten a dicidi di pidi ya caba ANG 21,6 miyon via Banco Central di Corsou y Sint Maarten. E prestamo lo duna Sint Maarten un impulso economico. Cft a delibera cu Ministro di Finansa tocante e plannan pa modernisa y optimalisa Oficina di Impuesto. A acorda cu dentro di poco lo presenta na Cft un proyecto di plan empresarial pa sustenta un peticion pa prestamo. Cft lo evalua e peticion na un manera constructivo y lo basa su dictamen riba un di dos opinion di experto.
Durante su bishita Cft a papia tambe tocante e reforma pendiente di tanto e sistema di pensioen como e sistema di cuido. Dia 13 di april Cft a conseha Sint Maarten pa finalisa e legislacion necesario pa e reformanan y ehecut’e prome cu fin di 2017. Cu e progreso reciente esaki ta factibel pa loke ta reforma di e sistema di pensioen. Sinembargo, tambe lo mester termina e aña aki e Ordenansa Nacional concerniente seguro medico nacional, despues di cual e berdadero ehecucion lo tuma luga.
Durante e encuentronan cu gobierno Cft a enfatisa cu maneho financiero ta leu di e nivel desea. Gobierno kier inverti den solucionnan cu IT cu mester yuda pa modernisa e administracion financiero. Ademas di e deliberacionnan cu Cft a hiba cu Conseho di Ministro y Parlamento, Cft tabatin tambe encuentro cu Gobernador Holiday, Sint Maarten Hospitality & Trade Association y APS. A haci un bishita na un di e proyectonan cu Fondo di Pensioen ta financia parcialmente, esta Rain Forest Adventure. E proyecto lo ta un expansion di e paketenan di atraccion turistico cu nan ta ofrece na Sint Maarten. Age Bakker a gradici tur partido pa nan colaboracion den e ultimo añanan y a wak atras na un ultimo bishita exitoso na Sint Maarten como presidente di Cft. “Den e ultimo añanan a logra hopi y mi ta convenci cu Sint Maarten por combina disciplina financiero cu un ambiente economico sano, algo cu ta atractivo pa inversionista stranhero.”