Eerste Kamer kier pa Aruba yuda e otro Islanan tambe tuma un Rumbo Positivo

Miembronan di Eerste Kamer cu ta riba un bishita di trabou na Aruba pa despues sigui pa e otro islanan a keda masha impresiona cu tur loke nan a mira aki. Nan a bisa cu e dinamismo y entusiasmo di Aruba ta wordo sinti den tur skina y cerca tur hende y empresa cu nan a bishita. Mescos cu e lider di e delegacion sra. Linthorst, Ben Swagerman (VVD) a bisa prensa cu e tambe ta haya cu e dinamismo di Aruba ta bisto.

Swagerman: “Loke mi kier trece padilanti ta cu e dinamismo y entusiasmo riba e isla ta haya masha hopi aprecio positivo, sigur di nos banda. Nos lo haci nos esfuerso pa hiba esaki bek cu nos Hulanda. E situacion di Aruba ta bon. Aruba ta trahando den un bon forma. Tin hopi iniciativa cu a wordo desaroya caba y tin mas na caminda”. Swagerman a comenta tambe riba e concepto y vision di Aruba pa loke ta e funcion di e gateway. Un funcion cu gobierno di Aruba ta promoviendo cu masha ardor pa algun tempo caba y ta wordo culmina den un conferencia “Europe meets the Americas” na luna di Mei venidero. Swagerman ta haya cu esaki merece atencion y mester sirbi como ehempel pa otro islanan di Reino den Caribe. “E ora bo ta haya e coherencia cu ta duna un extra aprecio y cooperacion for di Hulanda”.

Un pa un e miembronan di Eerste Kamer a mustra nan satisfaccion cu e situacion di Aruba. Nan ta bay bek cu recuerdonan agradabel di e isla aki cu su hendenan amabel, su tram, su encanto, su dinamismo y entusiasmo.