Den siman Minister di Enseñansa, Michelle Hooyboer-Winklaar a ricibi bishita di escritora Edselyn Figaroa, cu a yega na Minister pa presenta su serie di buki y proyecto 365 storia. Un serie di buki pa mucha skirbi na Papiamento diseña pa mayor y educadornan y e mucha mes lesa den nos idioma materno.
“Awe nos a ricibi e bishita di Edselyn Figaroa cu ta e motor tras di e serie di buki 365 storia”, asina e Minister a splica. Durante e encuentro a haya un bista completo riba e proyecto aki y e intencion tras di dje. “Nos a keda hopi impresiona cu e proyecto completo y tambe e calidad di e producto pa nos muchanan. E tabata e punto principal di nos combersacion”, e mandatario a agrega.
Siguiendo riba e tema, e titular di enseñansa a amplia bisando cu ta bay mira con por introduci esaki na un manera mas formal y structural na scol… “y nos a intercambia ideanan rond di esaki. Sigur nos ta mira cu tin espacio pa por trece esaki na e scolnan pa muchanan cu lo ta interesa den dje”, di acuerdo cu Minister Michelle Hooyboer-Winklaar.
“Algo a largo plaso cu nos lo kier evalua ta e miho forma pa hinca proyectonan asina structural den nos scolnan. Nos ta nota cu e material na Papiamento cu storianan interesante, educativo pa nos muchanan, ta haci cu nos ta hopi habri pa tur esunnan cu tin ideanan asina y mi ta kere cu esaki ta un tremendo iniciativa di Edselyn y nos kier mira si tin espacio na nos scolnan pa e proyecto di 365 storia”, asina e mandatario a termina bisando.