Ecotech Aruba N.V. cu donacion na Polis Ambiental

Recientemente na Linear Park a tuma lugar entrega di saco di desperdicio na Polis Ambiental di Aruba. Ecotech Aruba N.V., un compania cu tin medio ambiente di Aruba na pecho, a haci e contribucion grandi aki.  Durante un atardi ameno manager di Ecotech Aruba, Ramoncito Croes hunto cu Marketing & PR officer, Joanette Vrutaal a haci entrega di e donacion importante aki pa cu nos medio ambiente durante paradanan di Carnaval 59. Inspecteur Marlon Pieters y Roland Croes a acepta e donacion di e cahanan di saco di desperdicio, pa na nan turno reparti e saconan na tur esnan cu ta bin gosa di Carnaval durante e paradanan.
Ecotech ta splica e importancia pa un donacion asina: “Nos kier laga un Aruba dushi pa nos futuro generacion”, tabata e palabranan di Ramoncito Croes. No dushi den palabra so, pero tambe den nos medio ambiente. Pa asina nos futuro generacion tambe por disfruta di  loke nos a disfruta di dje akinan na Aruba. Un biento fresco, lama bunita, mondi y un naturalesa excepcional.
Cu e donacion aki nos ta un stap mas cerca na mantene nos medio ambiente y comunidad di Aruba por yuda mas door di cuminsa activamente cu reciclahe. Ecotech ya caba ta haci esaki, nos ta recicla diferente material pa asina minimalisa e cantidad di desperdicio cu ta termina den nos landfill na Parkietenbos.  Tambe nos kier a recorda un y tur cu na nos planta di reciclahe na Barcadera, tur diasabra bo por trece bo material  pa recicla, entre otro corant, papel, plastic y/ of aluminium; entregando esakinan bo ta ricibi Fun Miles.
Di parti di Ecotech Aruba, nos kier desea e comunidad di Aruba cu ta disfruta di carnaval, un carnaval festivo pero tambe bay poco poco. Manera Ecotech Aruba su slogan ta: iCare..iRecycle..iLove Aruba; ban stima nos medio ambiente durante nos dushi Carnaval 59!