Washington, D.C., MERCA- Economia Mericano a crece cu apenas 1.9% den e di cuater trimester di aña 2016, compara cu e estimado inicial, aunke e gasto di consumido tabata miho di loke tabata pensa. E aumento den producto interno bruto, e medida mas representativo di e situacion economico di un pais, ta un disminucion abrupto di 3.5% logra den e di tres periodo, segun e departamento di Comercio.
E crecemento di e di cuater trimester tabata e mesun cu a wordo calcula un luna pasa, aunke algun di e regelnan ta mustra un variacion leve. E gobierno a haya cu e consumido a crece na un ritmo mas lihe pero e compranan realisa pa gobierno y empresanan local a baha. Pa full 2016 e crecemento tabata di 1.6% apenas, e cifra mas abao den 5 aña. Desde cu recesion a termina na 2009, e crecemento anual tabata di un promedio di 2.1%, e cifra mas malo pa un periodo di recuperacion desde e fin di e di Dos Guera Mundial. President Donald Trump a priminti durante su campaña cu bou di su gobierno e crecemento lo ta di 4% of mas. El a sigura cu su plan di menos belasting, suavisa e norma y gastonan den area manera defensa y infrastructura lo hiba e economia na gosa di tasanan di crecemento cu no a mira den varios decada. Sin embargo, secretario di Tesoreria, Steven Mnuchin a ofrece un miho cifra. Den su opinion, e plan economico di Trump lo logra un crecemento di 3% of mas y cu e mehoranan lo no ta evidente sino te despues di 2018. Pero un crecemento di 3% ta wordo considera pa hopi economista como excesivamente optimista, den bista di factornan endemico manera e edad avansa di e man productivo. Actualmente hopi economista ta pronostica un crecemento di entre 2% y 2.5%. Algun ta bisa cu e lo por ta di 3% den e di dos mita di aña si cierto partinan di e programa economico di Trump, manera un recorte den belasting pa e clase media wordo aproba pa Congreso.