LAPA, Brasil – Autoridad Brasileño a cuminsa revisa diamars e plantanan di carni, cera pa un investigacion pa inspectornan sanitario pa motibo di corupcion y e supuesto benta di productonan den mal estado, mientras Hong Kong a dal un golpi nobo na e industria cu un prohibicion di importacion.
EGobierno di Michel Temer a move cu rapides desde diabierna pa enfrenta y minimalisa e escandalo den e sector di carni, un di e poco puntonan briyante den un economia cu ta sufri e pio recesion di su historia.
Mas tempran, diamars a apunta un victoria ora cu Sur Korea a lanta un prohibicion imponi e dia anterior na tur importacion di galiña di BRF SA, e mayor exportador mundial di carni.
No obstante, e prohibicion di Hong Kong, cu a sigui un decision similar di China, a mustra cu e crisis no ta conteni. China ta e mayor consumidor di carni Brasileño, sigui pa Hong Kong.
Union Europeo tambe a mantene su suspension na carni procedente di cuatro planta specifico, mientras cu Chile a haci loke e mester a haci cu un suspension total na importacionnan. E Departamento di Agricultural di Merca, a cuminsa analisa tur envio di carni curu y productonan cla pa come di Brasil en busca di patogeno.
E operacion contra e companianan di carni a culmina dos aña di investigacion cu razzia den plantanan procesador y oficinanan di shete estado durante fin di siman pasa.
Polis a acusa mas di 100 persona, den su mayoria inspectornan sanitario, pa acepta soborno pa permiti e benta di productonan putri, falsifica documentonan di exportacion of no revisa sikiera e planta envasador.
Entre e companianan implica ta e mayor productor mundial di carni, JBS SA y BRF.
Ambos ta rechasa cu firmesa e acusacionnan y a cuminsa cu un campaña publico na Brasil pa salvaguardia su reputacion y destaca e supuesto eornan den informacion revela te cu e fecha door di polis.
Gobierno di Brasil tambe a pasa den e ofensiva contra e operacion policial. “Nos ta confia cu no tin riesgo di salud publico asocia cu e carni Brasileño,” Luis Eduardo Rangel, secretario di standardnan den e Ministerio di Agricultura Brasileño, a bisa, prome cu e funcionarionan a cuminsa audita 21 planta identifica pa polis.
Ta spera cu e auditoria di e plantanan aki dura tres siman, Rangel a señala, kende a agrega cu funcionarionan Chines a pidi garantia dialuna cu e calidad sanitario di e productonan di carni Brasileño no a wordo comprometi.
“Nos lo bay presenta e carta aki awe cu nos garantianan y (…) ta spera cu nan lanta e restriccion na importacion,” el a comenta.
Na Peking, funcionarionan a pidi Brasil pa nan tuma medidanan di siguridad mas estricto den nan mandamento di alimento.
Fuente: Reuters