Aruba su Eagle Beach ta e di tres miho playa na mundo, y di dos miho den Caribe! Esaki ta segun ‘Travelers Choice Awards 2017’ di e pagina web poderoso, esta TripAdvisor.com. Nos Arashi Beach tambe a ricibi reconocimento for di TripAdvisor cu un posicion den e categoria di ‘Top 25 Miho playanan den Caribe’. Esaki ta un elogio hopi importante pa Aruba, enfocando unbes mas e satisfaction cu nos bunita playanan bou bishitantenan.
Barbara Messing, Chief Marketing Officer pa TripAdvisor a comenta cu nan a compila e lista di “world’s best beaches” pa asina inspira esnan cu ta planeando un “beach getaway.” Ganadornan ta wordo determina a base di e cantidad y cualidad di e reviewnan cu un playa ta ricibi riba e plataforma di TripAdvisor durante un temporada di 12 luna. Banda di e lista di top 25 beachnan rond mundo, TripAdvisor a compila lista pa e miho beachnan regional manera pa Africa, Asia, Australia, Caribe, Central America, Europa, Sur America, Sur Pacifico, Reino Uni (U.K.) y Merca.
Nos famoso Eagle Beach ta un di e beachnan preferi, na unda usarionan di TripAdvisor ta comenta cu ta esun di mas bunita di Aruba pa e santo blanco y bunita awa turquoise. Ademas, usarionan a indica di ta gusta cu e beach aki ta brinda hopi priva y espacio suficiente pa por disfruta di dje.
Arashi Beach, cu a posiciona su mes na di 18 luga riba e lista di ‘Top 25 Miho playanan den Caribe,’ ta famoso pa actividadnan di snorkeling y e abundancia di bida marino den e awanan. Comentarionan riba TripAdvisor.com ta cu e beach ta facil pa localisa cu transporte publico y tin hopi facilidadnan manera baño, luga cu ta bende snacks y bebida, palapanan, stoel di beach pa huur y luga pa parkeer.
Na 2016 e anuncio di e topnan aki a alcansa un total di 99 miyon di persona. Un promocion inmenso. A.T.A. lo sigui traha extrechamente cu TripAdvisor, asina posicionando Aruba debidamente. Mas cu claro lo sigui traha duro riba cuido di nos playanan. Relaciona cu esaki A.T.A. ta recorda pa corda Tene Aruba Limpi specialmente den temporada di Carnaval. E sushi cu ta keda ariba caya ta bay den nos awanan y tambe nos mondinan y e consecuencia pa esaki ta hopi devastante pa nos medio ambiente. Subi e pagina di facebook di oficina di turismo pa sigui e campaña di A.T.A. di Carnaval cu ta enfoca riba ‘Tene Aruba Limpi’.
A.T.A. ta hopi gradicido y honra pa e reconocimentonan internacional y ta sigui pone atencion ariba inovacion y creatividad den strategia di mercadeo pa asina sigui hiba e nomber di Aruba mas halto como destinacion turistico den tur parti di mundo.