DOHA, Qatar – Murtaza Ahmadi, e mucha homber Afgano cu a bira famoso rond mundo door di a bisti un jersey di Lionel Messi, traha di un saco di plastick, a cumpli cu e mayor di su soñonan: el a conoce su idolo.
E Comite Organisado di e Mundial di Qatar 2020, a tweet un video di e encuentro di e strea Argentino di Barcelona cu e chikito Murtaza den su brasanan.
E encuentro a tuma luga na Doha, unda cu Barcelona tey pa e dianan aki pa disputa un partido amistoso cu Al Ahli.
Murtaza di 6 aña a capta atencion di tur hende ora cu un potret di dje bisti cu un jersey traha di un saco di plastick a bira viral. E saco, di strepinan blanco y blauw, tabata tin e nomber y e number 10 di e Argentino, skirbi cu ink blauw.
E internautanan a cuminsa busca e mucha misterioro desde Januari ultimo, tempo cu un di e cuentanan mas popular di e fanaticonan di Leo Messi riba Twitter a publica un imagen di dje den loke e tabata tin bisti un jersey di plastick cu nomber di e futbolista.
Mas despues, e chikito a ricibi un jersey original di su idolo y un bala di futbol, su tata Arif Ahmadi, a bisa CNN.
“E kier conoce Messi”, e tata a bisa e tempo ey. Y e soño ey a bira un realidad.
Fuente: CNN en Español