E di dos ronda di e campeonato nacional di Lionfish ta bayendo full speed y tur cos ta mustra cu e siguiente dos simannan hopi Lionfish lo keda saca for di nos awanan. Lionfish manera ta conoci ta un especie invasivo cu no ta pertenece den nos awanan cu ta forma un menasa pa pisca local y di e forma aki ta menasa nos industria di pesca como tambe esun di turismo. Pesey, instancianan local ta pone esfuerso pa combati e especie aki. E aña aki, Fundacion Centro di Pesca Hadicurari a pone su mes na cabes un biaha mas door di organisa y patrocina e Hadicurari su Reto di Lionfish 2016 pa di 2 aña consecutivo. Cu mas di 4000 florin na premio e ta un serie di evento hopi atractivo pa amantenan di pesca y alabes ta yuda e causa di proteha nos rifnan.
Prome parti a finalisa cu casi 90 Kilo di Lionfish
For di comienso di november gruponan a sali y elimina pisca. Den e prome parti di e torneo cu a termina diadomingo 13 di november ultimo, a keda na di dos luga e ekipo di JADS Crew consistiendo di Rosaira Semeleer, Jair Vlaun, Rudolf Ulloa, Susan Hieter, Jean Pierre Fang y Michael Boland. E premio di e prome parti di e reto a bay pa e team di Lionfish Go, consistiendo di Patrick van Brakel, Luciano Mazzeo, Roy Keulers y Rob Abbringh, kendenan a gara 84.9 Kilo di Lionfish, como tambe premio pa e Lionfish mas grandi y mas chikito.
Parti final di awo pa 26 di November
E di dos parti di e campeonato ta tumando lugar unda ya caba un cantidad substancial di Lionfish ya a keda entrega y cada dia mas ta drentando. Un total di 6 team bon ekipa y cu hopi experiencia ta hibando un bataya fuerte cu lo termina diasabra 26 di november proximo riba beach dilanti di Hadicurari unda lo reparti e mas di 4000 florin na premio. Tur e pisca colecta lo ser usa pa e cookout di diasabra, cual ta proyecta pa 3 pa 5’or di atardi na beach y entrada ta un sonrisa. Parti di e Lionfish gara, tambe lo ser entrega pa e evento di recaudacion di fondo Lionfish and Wine Tasting cu lo tuma lugar diadomingo 27 di November, unda ya caba ta bendiendo tickets na Oficina di Jolly Pirates Aruba pa unicamente 50 Florin.
Pa mas informacion por yama 586-0820 of 586-6610 of bishita pagina di facebook di Aruba Reef Care Foundation of di Hadicurari Centro di Pesca.