Diaranzon anochi na Surf side marina, durante e anochi di introducion di e plan di maneho nobo, cual anochi a wordo organisa pa tur hoofd van diensten cu ta cai bou di e ministerio di husticia, pero tambe na entre otro es nan di plataforma profecional y otro departamentonan di vital importancia. Señora mr. Simone van der Zee, kende ta un experto riba e area di criminalidad, tawata e prome persona pa hiba palabra, na e sala yen di personanan cu a bin atende cu e anochi aki. Su persona a splica na esunnan presente, cu e ta un comportamento normal den cada persona, pa ora cu papia di criminalidad, nan bira wak den direccion di polis of ministerio publico. Pero cu den un principio, ora cu polis y ministerio publico tin pa atende cu un persona cu a opta pa bay den mal caminda, cu ya caba e daño a wordo haci caba y nan ta djis ta haciendo e parti represivo. Segun e criminologo mr. Van der Zee, cu nos mester ta consciente cu esaki nifica, cu pa evita crimen no nifica necesariamente tin mas polis riba caya of pa duna strafnan pisa na es nan cu a comete un delito. Pa tin mas polis riba caya no ta nifica cu actividad criminalidad lo stop. Of door di duna straf mas halto na un criminal lo nifica cu a soluciona e problema of cu nan lo pensa pa no haci nan actividad criminal. E experto ta di opinion cu e cuidadano mester ta conciente cu polis y ministerio publico ta literalmente e ultimo recurso pa acudi na dje y cu e prome recurso pa contra aresta criminalidad, ta cuminsa na cas.
Señora mr. Van der Zee, a splica cu estudionan haci a comproba, cu responsabilidad pa tin un comunidad mas sigur ta e simpel hecho cu mama cu tata, mester percura pa nan yui entre e edad di cero pa seis (0 pa 6) aña, wordo bon educa cu norma y balornan. Banda di esaki su persona splica cu tin varios estudionan academico cu a demostra, cu e ta di vital importancia pa durante e crecemento di cada mucha, cu nan mester tin e figura paterno den nan bida, contrario na e opinion general di antes, caminda tawata pensa cu mama por tin e rol di un tata su so tambe. Esaki tin di haber cu varios aspecto cu ta hunga un rol grandi den e era aki. E especialista riba e tematica a duna ehempel di dos mucha, ambos den diferente situacion, pa ilustra na e publico kico ta loke realmente ta e problema pa cu criminalidad y e rais caminda cu esaki mester wordo trata debidamente pa preveni. Despues cu sra. Van der Zee a termina, su persona a ricibi un fuerte aplauso di e sala.