Sr. Ben Marapin a splica cu e proximo gobierno cu sinta, lo no por duna su mes e luho di gasta placa ya cu no a resta mucho placa pa inverti den enseñansa of siguridad, pa menciona dos cos. Pero kico por spera como solucion?
Na prome luga, si Aruba mes mester haci’e, esey ta nifica cu pa e siguiente gobiernonan no tin mucho espacio pa haci cos dimas. Anto esey no kiermen luho, pero Sr. Marapin ta bisa cu nan mester ta hopi cauteloso cuanto nan ta bay gasta. Mester wak e situacion como un pashent cu ta sangrando. Y actualmente e sangramento ta wordo minimalisa, y no sa con hopi e ta. Banco Central mes a bisa cu e deficit te September 2016 tabata 166 miyon. Loke por spera cu at least, e sangramento ta bira menos. Pero no kere cu si ba stop e sangramento, a yega na un situacion bon. Pasobra e pashent a perde hopi sanger, door cu e debe ta astronomico.
E di dos, pa haci esey, pa haya hopi forsa, lo mester haya hopi aña cu surplus pa reduci e deficit. Otro opcion ta cu donor ta bin cu sanger fresco (ayudo financiero). Den e caso aki Hulanda, cu lo bisa ok, nos ta alivia e debe cu 1 of 2 biyon. Pa asina e por ta pagabel e interes y pa resta poco placa pa inverti den bo enseñansa, siguridad y loke mas ta necesario.
Segun Sr. Marapin, lo mester di bay wak unda e sapato ta preta pa wak si tin mas espacio pa sigi crece o keda manera nos ta. IMF a indica cu segun nan nos a yega na e piek di nos economia. Sr. Marapin no ta comparti e opinion, pasobra e ta di opinion cu tin espacio pa sigui crece. Pero e lo exigi di nos un esfuerso hopi grandi pa esey. Un esfuerso grandi di parti di gobierno, di parti di comerciantenan y di trahadonan. Y no lubida, Aruba en general. Nos ta draai ariba turismo pa nos atrae turista nos tin cu ofrecenan productonan di calidad halto.
Tur hende ta papia di trece turistanan di entrada halto, pero esakinan ta exigi calidad halto. Turistanan cu ta bin aworaki, no ta gasta y esey tin di haber cu e sorto di turista cu bo ta defende. Ta pesey den pasado Sr. Marapin a defende e yegada di Ritz Carlton. Ohala lo por haya un Four Seasons. E bishitantenan di e hotelnan ey, ta gasta basta bon, Sr. Marapin a bisa.
Por ultimo, segun Sr. Ben Marapin, loke mester tene na cuenta ta con stricto e maneho mester ta pa loke ta e appartmentnan, e B&B (Bed & Breakfast), pasobra cu eynan ta haya e turistanan cu ta haci uzo di nos facilidadnan di turismo sin contribui algo na dje.