Dia 18 di April proximo ta cuminsa trata e presupuesto 2018 di Pais Aruba den Parlamento. Tin di remarca cu e presupuesto aki segun articulo 13 lid 4 di LAft, mester a wordo entrega for di dia 1 September 2017 caba na Parlamento di Aruba pa e gobierno Eman II. Pero debi na e falta di seriedad pa atende cu e problemanan creciente di entre otro finanza publico di nos Pais, gabinete Eman II a scoge pa no entrega e presupuesto 2018 y CAft, e instituto cu mester a percura pa esaki tuma luga, ‘stond erbij en keek ernaar’.
Riba dje nos por mira den prensa cu ta afilia na Sr. Eman, cu e ta pretende di a laga e situacion financiero na un deficit di 0.5% di nos GDP, siendo cu e realidad actual ta diferente! Aruba a hereda un deficit di 3.9% na man di gabinete Eman y esaki a wordo haci publico pa instancianan imparcial manera CAft, y Algemene Rekenkamer pa menciona algun.
E mas tristo ta cu esaki a trece un decadencia social hunto cun’e. Ta wordo anticipa cu den e reunion publico di Parlamento, oposicion di partido AVP lo kier desvia atencion di e realidad aki aplicando e mesun scenario di manipulacion cu nan a hiba den campaña electoral na september pasa, pero e ta nos deber como representante di pueblo pa contradeci esaki y atende cu e presupuesto na un manera serio y al caso.
Hende ta central
Na formacion di gabinete Wever-Croes I, partidonan MEP, POR y RED a palabra cu lo hiba un maneho unda ‘Hende ta central’ y lo maneha Pais Aruba a base di principionan di bon gobernacion pa asina por scapa Aruba di yega na un explosion social y hundi mas den e abismo financiero. Awor ta keda na gabinete Wever-Croes I, pa pone esaki den practica segun e exigencianan y normanan stipula, y realisa e acuerdonan aki. Parlamento na su turno lo tin di percura y insisti pa gobierno cumpli cu esakinan pa asina Pueblo den su mayoria por haya confiansa atrobe den e funcionamento di e aparato gubernamental. No por descarta cu lo tin di tuma pasonan firme pa drecha locual cu a bay robes, pero por sinti e boluntad di gobierno y hasta otro instancianan den comunidad pa logra un cambio pa mihor y uno duradero pa Pais Aruba.
Problemanan structural pa atende
Pa nos logra esakinan mester remarca cu ta necesario cu Aruba tin di ahusta su leynan riba diferente ramo pa por trece cambionan structural. Cambio unda cu por ehempel ta limita nombracionnan cu ta afecta nos departamentonan enbes di capacita nan, te na cambionan den nos kiesverordening cu ta percura pa realmente nos politica conoce un nivel mas halto. Si nos atende e problemanan aki na un forma serio y trata nos presupuesto diligentemente nos lo cumpli cu e debernan nos dilanti y hiba Aruba na un otro nivel.