CARACAS, Venezuela- E moneda digital crea pa e gobierno di Nicolas Maduro, cu di e manera aki ta busca pa resisti e sancionnan di Merca y Union Europeo, ta respalda pa mas di cinco biyon bari di petroleo.
Diaranson ta cuminsa e prebenta di e petro, un criptomoneda difente na tur otro: el a wordo crea pa un gobierno (Venezolano) y sustena pa reservanan energetico gigante y mineralnan die pais Suramericano. E lo drenta den e mercado di criptomoneda mundial.
E moneda virtual aki, ta wordo respalda pa 5.4332 biyon di bari di crudo certificsa den e campo 1 di e Bloque Ayacucho di e Faya Petrofilera di Orinoco. E ta perfila su mes como un di e criptoactivonan mas sigur den e mundo di inversion”, segun e Observatorio Venezolano di Tecnologia Blockchain.
E proceso di prebenta, cu lo cuminsa na 82.4 miyon di unidad di e moneda virtual, lo extende pa un luna cu e meta di capta inversionistanan, pa despues sigui pa su benta formal, segun e portal di Ministerio di Comunicacion.
E balor di e petro ta ekivalente na e prijs actual di un bari di petroleo Venezolano (60 dollar). Segun Carlos Vargas, superintendente di Criptomoneda y Actividadnan Conexas, ta spera cu e su compra lo atrae inversionistanan di Qatar, Turkia, Medio Oriente y Merca, apesar cu e ultimo pais aki tin prohibicion di realisa transaccionnan cu Venezuela, debi na e sancionnan financiero impone door di Washington.
E moneda virtual aki, crea pa gobierno di Nicolas Maduro pa afronta e grave situacion economico cu e pais Suramericano aki ta pasando aden. E situacion ta wordo caracterisa cu un subida di prijsnan di productonan di consumo masivo, fiha riba un base di tasa ilegal pa e compra y benta di dollar, mei mei di sancionnan financiero impone door di Merca y Union Europeo.
Segun informenan, e petro tambe lo por wordo uza pa cumpra bienes y servicio, paga belasting y por wordo cambia pa placa inorganico (placa di berdad) y otro criptoactivonan a trabes di casnan di cambio digital.
Presidente Venezolano, Nicolas Maduro a afirma cu su pais ta “pionero na nivel mundial” pa emiti un criptoactivo respalda den recursonan mineral.