Ohio, MERCA- E catcher Arubano Shawn Zarraga a wordo laga liber door di e ekipo di Cincinnati Reds. Den e offseason, Zarraga a firma un contract di Minor League cu Reds, pa motibo cu e ekipo ey a dun’e e miho sensacion.
Despues di un temporada cu el a pasa entre Tulsa Drillers (AA) y Oklahoma City Dodgers (AAA), Zarraga a opta pa wak rond. Casi na final di temporada di Mayor League, el a wordo yama pa asina yena un puesto vacante cu e catcher Carlos Ruiz tabata suppose di a yena, pero na e momento ey ainda e no a yega Cincinnati despues cu el a wordo cambia cu Dodgers for di Phillies. Pero Zarraga su estadia a dura solamente un dia y e no a hunga ni un wega.
Den un articulo ariba honkbalsite.com, Zarraga ta declara cu Reds tabata e ekipo cu a mustra mas interes den dje. Apesar di tabata tin mas oferta, el a opta pa Reds pa motibo cu el a sinti cu nan tabata echt kier e den nan organisacion.
Shawn a pasa basta tempo riba e lista di lesionadonan ora cu Dodgers a pone riba e lista di 7 dia, dia 15 di April.
Dia 20 di Juni el a wordo manda pa Tulsa Drillers y for di e momento ey, ela keda subi,baha. Di AA pa AAA y bek abao atrobe. Aunke cu Shawn su numbernan tabata super bon den su temporada den AAA, cu OKC Dodgers e tabata tin problema na plato. El a bati un average di .167 den 19 wega. Den AA, al contrario, su bateo tabata hopi bon, .306/.384/.388. Tras di plato, Shawn a saca 20% di e potencial coredonan cu ta roba base. CU Tulsa Drillers, esey tabata 43%.
Durante e World Baseball Classic, Shawn a catcha tres wega pa e team di Reino Hulandes: vs Israel, vs Cuba and vs Puerto Rico. En total, el a bati di tres hit den 11 turno na base (.272).
No ta keda nada mas awo, pa wak si Zarraga lo haya un otro club cu interes den su servicionan. E lo no ta e prome hungado di Antiyas cu lo hunga un temporada den e Division di Honor di Hulanda.
Fuente:www.mosaesports.com