BOGOTA, Colombia – E opcion di e “no” na e acuerdo di paz firma pa e Gobierno Colombiano cu e guerilla di FARC, a gana e referendum firma diadomingo den e pais, ora cu a keda menos di 1% di e mesanan pa scrutinia, segun datonan oficial.
Cu 99.08% di e mesanan conta, e “no” na e acuerod di paz a logra obtene 6.400.516 voto, cu ta ekivale na 50.24% di e total, mientras cu e “si”, cu a cuminsa na lidera e recuento, a alcansa 6.338.473 papeleta, cu ta representa 49.75%, loke ta supone un bentaha di 62.043 voto.
Pa e referendum tabata valido, tabata rekeri cu e opcion di “si” lo a obtene por lo menos 13% di e censo electoral di 34.899.945 ciudadano habilita pa vota, loke ta nifica cu lo tabata tin mester cu e minimo di 4.536.992 voto.
E colegionan electoral di Colombia a cera diadomingo despues di ocho ora e votacion di e referendum pa ratifica e acuerdo di paz firma cu guerilla di FARc, cu a wordo marca pa awasero den gran parti di e pais, loke a afecta e afluencia pa e urnanan.
E votacionnan a conclui pa 4’or di atardi, ora local, apesar cu e Gobernadornan di e costa Atlantico a pidi den un carta na e presidente Colombiano, Juan Manuel Santos, e prolongacion di dos ora debi na e problemanan causa pa e awasero den e region ey.
“Bo ta apoya e acuerdo final pa e terminacion di e conflicto y e construccion di un paz stabil y duradero?” ta e pregunta cu e Colombianonan a responde marcando “si” of “no” den e referendum.
E acuerdo a wordo firma dialuna pasa na Cartagena de Indias pa e presidente Colombiano, Juan Manuel Santos y e number un di e Forsanan Arma Revolucionario di Colombia (FARC), Rodrigo Londoño.
E hornada electoral a wordo marca pa awasero y inundacion den varios region Colombiano, specialmente e costa Atlantico, unda cu e inicio di e votacion a restrasa den hopi municipio of a disminui e participacion di e ciudadanonan.
E awaseronan intenso a wordo atribui pa autoridadnan na e rabo di horcan Matthew cu ta avansa den Caribe.
Fuera di e problemanan causa pa meteorologia, e hornada electoral di awa tabata esun di mas trankilo cu e pais ta recorda, no solamente pasobra FARC ya a firma paz, sino pasobra e Ehercito de Liberacion Nacional (ELN), di dos guerilla di e pais, a anuncia cu no lo bay tin accionnan ofensivo den e dianan aki pa no compromete e referendum
Presidente Juan Manuel Santos a acerca pa vota y a dirigi algun palabra na su compatriotanan pa nan acerca na e urnan pa vota. “Paz ta e caminda pa nos yiu y nietonan tin un miho futuro,” e mandatario a bisa, kende a invita e Colombianonan pa nan eherce nan derecho di vota: “mi ta spera cu tur Colombiano sali pa bay vota.”
Fuente: NTN24