Desde principio di aña cu partido MEP a lansa su campaña por a mira un campaña profesional y bon coordina. Un cara nobo y moderno di partido. E actividadnan cu practicamente tabata tin mensualmente tabata magno y cu presencia di miles di persona. E reconocemento na miles di baluartenan a trece MEP bek cerca di pueblo, manera tempo di Betico.
Tabata obvio cu MEP a scucha pueblo, y MEP a pensa riba e solucionnan cu pueblo ta desea.
Na momento cu a cuminsa presenta candidatonan di peso desde trempan den campaña, e animo a crece mucho mas serca e pueblo votador. Y tur esaki a refleha dia a haci entrega di e miho lista den e eleccion aki, cu ta e lista di partido MEP.
Partido MEP tin e vision y e ekipo pa soluciona e problemanan di nos pais, a wordo bisa cada biaha.
Tur esaki ta basa riba vision y liderasgo di Evelyn Wever-Croes y su ekipo. Esaki a refleha tambe den su posicion como “votegetter” di partido MEP y second votegetter di Aruba.
Un dama prepara, cu experiencia profesional amplio den tanto sector publico como den Gobierno; un politico cu experiencia; un mama, abuela, esposa.
E liderasgo di Evelyn y su forma incansabel di traha dia aden y dia afo pa partido MEP a duna su frutonan. Su liderasgo a wordo cuestiona y poni na prueba, pero na fin di dia, Aruba a responde.
Awor ta toca na su persona pa purba forma un Gobierno cu dos otro partido, un tarea no facil, pero cu e conocemento y experiencia cu Evelyn tin, e lo sa di haci esaki tambe exitoso.
Pabien na MEP y lider Evelyn Wever-Croes.