Eleccion 2017 a tuma luga y e resultadonan ta conoci caba. Apesar cu AVP ta e partido mas grandi den e eleccion aki, tabata bisto cu el a bay atras den mayoria di e urnanan. Contrario ta cu MEP, cu aunke el a core cabes cabes cu su oponentenan berde, toch a sa di bay dilanti barbaramente. E sorpresanan pa e eleccion aki tabata naturalmente POR, cu ta un partido cu apenas a cuminsa, debi cu el a keda funda na December ultimo y tambe RED, cu compara cu den e eleccion anterior, tabata hopi atras den voto, e biaha aki a dal un salto basta halto y a logra haya un asiento. Te asina leu e reparticion den asiento ta lo siguiente: MEP cu 7 asiento y 2 restzetel, AVP, 8 asiento y 1 restzetel, POR 1 asiento y 1 restzetel y partido RED cu un asiento.
Pa loke ta e cantidad di voto ta como lo siguiente den orden di aparicion:
Raiz – 2107 voto, PPA/UPP – 656 voto, MEP – 22078 voto, Curpa – 468 voto, POR – 5531 voto, MAS – 287 voto, RED – 4167 voto y AVP – 23385 voto.
Tin cu remarca cu durante e conteo di voto, tabata tin varios urna cu tabata un poco problematico, mirando cu hasta polis mester a wordo yama, pa asina finalisa e cuenta. Tabata tin hasta comentarionan riba medionan social cu e conteo tabata tarda masha hopi mes cerca e ultimo dos urnanan, pero na final, casi pa 3’or di mainta, e ultimo urna a drenta y finalmente e resultadonan.
E siguiente paso lo ta cu Conseho Supremo Electoral lo bay manda un carta oficial pa Gobernador di e resultadonan final y pa dialuna te cu asina leu, Su Excelencia lo bay reuni cu e partidonan.