ENTERTAINMENT
Eric Clapton a revela cu e ta birando sordo y cu el a wordo diagnostica cu tinnitus, cu ta consisti den sinti golpinan, rasca of fluitmento den e oido cu no ta procede for di niun fuente externo. E causa principal di esaki ta e exposicion na desordo.
“Ainda mi ta traha, mi ta haci algun concierto, pero loke ta preocupami mas ta cu mi ta den mi 70 aña y ainda mi por traha”, e musico di 72 aña a bisa den un entrevista cu BBC. E ta promocionando su documental Eric Claption: “Life in 12 Bars”.
“Mi ta birando sordo, loke mi tin ta tinnitus, y mi mannan apenas ta funciona. Mi kiermen, mi ta spera cu hendenan bin wak mi toca mas leu di pasobra cu mi a bira un curiosidad. Mi sa cu esey tambe ta forma parti, pero ta parcemi increibel pa sigui haci esaki”, Clapton a agrega.
E compositor Británico ta sufri tambe di neurotipica periferico, cu ta causa debilidad y dolor den man y pia, cual ta haci’e dificil pa toca guitara.
E interprete ta tata di 5 yiu. Tragedia a bati na su porta ora cu Connor Clapton di 5 aña a muri na 1991, despues di a cay for di e di 53 piso na New York. Na su honor, el a scirbi un di su hitnan di mas grandi di su carera, Tears in Heaven.