Pa di 4 aña consecutivo, Departamento di Agricultura, Cría y Pesca conoci como Santa Rosa, conhuntamente cu Stichting Monumenten Fonds y Departamento di Cultura a forma parti di e comision organisado di e tan popular “Fiesta di Cunucu”. Un evento cu poco poco a bira un actividad sumamente popular, caminda cu e ambiente di cunucu ta wordo treci dilanti den un forma unico.
E aña aki a toca turno na e cas antiguo situa na Tanki Leendert 65, caminda cu e diferente Departamentonan a traha incansabel pa prepara un programa netamente crioyo. E proposito di e evento ta pa conscientisa nos comunidad encuanto di e balor di conserva nos arkitectura local sin lubida nos tradicionnan y aporte di nos Sector Primario y cu un ambiente netamente cultural. Santa Rosa tabata encarga pa prepara e sitio y tambe a invita un grupo di productornan local pa bin expone y bende nan productonan como tambe diferente standnan cu cuminda crioyo, pa asina conscientisa y motiva otronan pa nan tambe considera nan aporte na nos produccion local.
Minister Chris Romero a bishita e evento y tabata tin e oportunidad pa combersa cu e diferente productornan presente cu sigur a laga un bon impresion serca e mandatario. E stand nan a ofrece diferente productonan herbal, diferente tipo di biña, likeur, rom, jam, tur produci cu frutanan cultiva aki mes na Aruba. Plantage Dabaru tambe tabata presente cu nan productonan vegetariano sin laga afo esunnan e productor di habonnan traha local y e artesanonan local. Durante su bishita, el a pasa y combersa cu cada un di e productornan, kendenan tabata contento cu e atención duna door di e Minister encarga cu Sector Primario. Tambe e Minister a bishita e cas antiguo cu tabata completamente muebla cu diferente mueblenan di antes, creando asina e ambiente netamente di antaño.
Minister Romero a expresa cu e tin e Sector Primario como un di su prioridadnan y ta contento di por a aprecia cuanto persona local ta activo caba y lo desea di por bin cu mas programa y proyectonan innovativo pa asina crea mas oportunidad pa nos productornan. E tin interes tambe pa scucha for di e productornan mes, kico ta nan deseonan y pa na su turno, sondea posibilidadnan con Gobierno lo por yuda nan pa por produci mas ainda y cu e mesun entusiasmo cu nan a sa di demostra ayera.
Na e momentonan aki, Minister Romero tin planea pa hasi un bishita oficial na e Departamento di Agricultura, Cria y Pesca pa sera conoci cu henter e team y asina studia e posibilidadnan pa implementa strategianan nobo y moderno cual por aporta grandemente na Aruba su Sector Primario cu ta integral den e planificacion di Aruba su Plan nacional di Siguridad di Cuminda pa nos isla.
“ Sostene nos cultura, practica Cria, Pesca y Agricultura”