E di 12 Expo y Competencia di Obra y Arte recicla ta cuminsa

AHATA su Comision di Medio Ambiente tin 12 aña caba organisando e competencia di obra y arte recicla. E aña aki sigur esaki lo wordo organisa un biaha mas durante 15 pa 26 di april, 2013. E ultimo dia pa inscribi ta dialuna 1 di april pa categorianan individual/grupo y pa School lo ta dia 15 dia maart. Cas di Cultura lo ta sede un biaha mas pa e gran exposicion aki, apertura lo ta 15 di april pa 3:00pm.
Duarante añanan AHATA su Comision di Medio Ambiente ta organizando e expo y competencia aki, nos por mira hopi creatividad, unda cu e participantenan a reuza y lo por sigui reuza, foam bleki, plastic, papel, glas, aluminium of carton y uzando adicional verf y lijm.
Lo tin 7 diferente categoría: kleuter scol, scol basico di 1ste te cu 3de klas, scol basico 4de te cu 6de klas, scol secundario, individual amateur, individual profesional y grupo/hotel/negoshi. Tur participante lo haña un certificado y e ganadornan lo haña premionan di diferente sponsor.
E hurado lo basa nan escogencia riba: e producto cu a wordo uza, creatividad, detaye y acabado, porcentahe di material recicla uza, tecnica cu a wordo uza, kiko por haci cu e objecto, si e participante a uza e materialnan re-uza y por ultimo si e participante a uza uno of mas di materialnan re-uza.
AHATA Comision di Medio Ambiente ta invita pueblo pa visita e exposicion na Cas di Cultura di dialuna pa diabierna di 2:00pm pa 6:00pm y admira e creatividad cu nos comunidad ta ofrece. Entrada ta gratis. Di e forma aki AHATA ta desea di corda nos comunidad riba e 3-R: Reduci, Resusa, Recicla.
Un danki di antemano ta bai na Coca Cola main sponsor di e Expo y Competencia y na tur otro sponsors cu di un manera of otro ta haci e competencia, exposicion aki posibel.
Como un toque interesante y valioso nos ta ofrece un tayer di arte di carton na e participantenan di e competencia. Un danki special na señor Jose Brouzzo facilitador di e tayer aki y un danki special na Talk of the Town main sponsor di e tayer aki.
Pa inscribi of haya mas informacion por yama libremente entre dialuna pa diabierna durante ora di oficina na 5822607 of email vanessa@ahata.com
Bini un y bini tur. Sea creativo y consciente pa cuida nos medio ambiente!