Den e fin di siman venidero, Stingray Swimming Team of Aruba lo ta organisando nan competencia anual di landamento cu e 11th Annual Stingray Challenge Swimming Competition esaki na Piscina Roly Bislik na Savaneta.
Henter e weekend venidero Aruba lo ta den gara di bon nivel di competencia den e deporte di landamento unda nos miho landadonan lo bataya pa e premio maximo contra e miho landadonan procedente di Surinam, Boneiro y Corsou. Riba diabierna a inicia cu e parti di e ceremonia di desfile esaki pa 7or di anochi, mientras pa 7’or y 30 exacto e competencia mes a start.
Pa su mañan diasabra as cuminsa cu e competencia den oranan di mainta esaki pa 9or cu e prome rondanan mientras pa 6ordi atardi lo landa e finalnan. Diadomingo lo ta e ultimo dia di competencia cuminsando pa 9or di mainta mientras pa 1or di merdia lo haci entrega di premionan na e teamnan ganado. E categorianan den cual lo competi ta 6 & under, 7-8, 9-10, 11-12, 13–14, y 15 y open.
Por ultimo e competencia lo ta bou encargo di nos referee, hurado y timekeepers certifica pa FINA. Den e ultimo añanan e competencia di Stingray Challenge a bira masha popular unda tur club di Aruba ta participa mientras esnan di exterior semper a bin Aruba y asina engrandece e evento di landamento.
Un danki sigur na Lotto, e Loteria di Aruba pa medio di Comision di Subsidio cu a yuda subsidia parti di e Stingray Challenge Swimming Competition organisa pa Stingray Swimming Team of Aruba.
Cumprando weganan di Lotto, e Loteria di Aruba bo ta contribui na deporte riba nos isla. Meta di e fundacion ta pa organisa loteria, cambia bida di su hungadonan y na mes momento inverti den deporte local pa medio di donacionnan na e Comision di Subsidio.