E calidad di e gobierno, e maneho publico (e “Openbaar Bestuur”)

0

E guera entre e “Establishment” (na Hulandes: “De Gevestigde Orde”), hunto cu e clase elite (clase halto den sociedad) di un banda, y e pueblo na otro banda, por ser spera na Aruba tambe na aňa 2017.

E LISTA DI DESEO DI E PUEBLO.
Den parti 1 di e serie aki mi a trece dilanti caba cu e Pueblo Arubano ta desea lo siguiente pa e eleccion na September 2017:
Cu Pais Aruba desde september 2017 tin un gobierno di bon calidad, transparente, honesto, decente y husto;
Cu – siguiendo ehempel di Merca – e miho profesionalnan riba cada tereno ta goberna nos Pais Aruba;
Cu fronteranan ta wordo cera, y ilegalidad ta wordo tratá cu man duro, na beneficio di siguridad riba nos isla;
Cu tur Arubiano tin trabao y pues un entrada;
Cu ta bin un fin na e continuo y tantisimo casonan di fraude y corupcion bao di e gobernantenan y nan cartelnan di partido.

UN PRESUPUESTO BALANCEA (“balanced budget”).
Pa motibo di un maneho desastroso riba tereno financiero desde aña 1986, Pais Aruba tin un deficit cronico riba su cuentanan anual di entre 200- y 400 miyon florin pa aña.
Lo ta algo masha facil pa cambia e deficit anual den un presupuesto balancea pa aña 2018, y crea fondonan door di yega na “overschot”-nan, basta bo elimina fraude, corupcion, biahenan innecesario pa exterior cu estadianan den hotelnan di 5 strea, evita di come den restaurantnan caro, stop di organisa y atende tur clase di conferencianan inecesario, re-organisa e aparato gubernamental sumamente pisa, pa cuminsa e departamento di impuesto y esun di finansas, esta e centralnan nacional di engaño (“bedrog”), estafa, (“oplichterij”), manipulacion (pa logra cierto metanan dudoso).
Esaki lo hustifica un peticion na Hulanda pa refinancia e deuda exterior na e interes desea di 1,5%.
Esaki no ta rekeri ningun arte of magia, tampoco e ta nada dificil; solamente ta necesario bon boluntad na luga di e modus operandi actual di enrikecimento propio y ladronicia.
E META AKI POR SER ALCANSA SIN NINGUN MEDIDA FINANCIERO CONTRA E PUEBLO OF E COMERCIO DI ARUBA!
E profesionalnan berdadero cu lo mester goberna nos pais, tambe lo por pone economia crece, y esaki cu minimalmente 3 pa 4 por ciento pa aña, y e ora ey hasta prosperidad pa UN Y TUR ta wordo crea!

HIDRO-ENERGIA Y VEHICULONAN HIBRIDO
Naturalmente e ciudadano Arubiano no tin ningun interes den parkenan di molina di biento ni den energia di biento.
Nos aire ta limpi, y nos ciudadanonan ta interesá unicamente den tarifanan pagabel di awa y electricidad.
Esaki ta posibel si duna un oportunidad honesto na e energia hidro importa, un proyecto di e partido politico MEP.
Na tur pais of regionnan unda tin energia hidro, e tarifanan ta abao. Wak por ehempel Suecia, Noruega, Suisa, Colombia, Suriname, Panama, Las Vegas, Canada, Niagara Falls, y banda di e cinco Lagonan Grandi na Merca.
Y si nos kier re-emplasa e importacionnan grandi di crudo pasobra no tur ora nos tin bastante dollar pa esey, e ora ey nos mester bin cu metanan concreto pa por cambia pa vehiculonan hibrido y di coriente. Ta tur caminda esaki ta sosode, pues pakico no na Aruba!
Awa y electricidad ta prome necesidadnan vital, cu na prome luga mester ta pagabel, y energia di biento y energia solar ta hopi leu di ofrece esey.
Un Gobierno mester realisa su mes cu e prosperidad grandi di e mundo occidental a haci su entrada hunto cu e revolucion industrial, tempo cu e mashin di vapor a wordo inventa y cu electricidad a bira disponibel!
Y e prosperidad aki e Pueblo NO kier perde pa motibo di e experimentonan costoso riba energia “berde” di Mike Eman!

MANEHO ECONOMICO
E miho economista y mas cualifica den e funcion di minister pa Asuntonan Economico mester percura pa e economia di Aruba crece cu 3 pa 4%.
Tin un cantidad di posibilidadnan cu nos propio yiunan di tera ta menciona den medionan.
Conocimento y vision aparentemente ta disponibel suficientemente riba Aruba, pero nos hendenan no ta haya ningun oportunidad ni bao di un Gobierno berde, ni bao di un Gobierno geel, y esaki pa venganza pasobra nan no ta pertenece na nan cartel di partido.
E lider di e partido PPA, Benny Nisbet, regularmente ta skirbi tocante construccion di barco (shipbuilding) y servicio na barconan (shipservices) na San Nicolas, un Aruba World Trade Center riba waf na Playa, y otronan ta scirbi tocante transformacion di IMSAN den un hospital completo (“full fledge”); haci Caya Betico Croes habitable cu pisonan di vivienda (“flats”) pa haci cu hendenan ta bolbe frecuenta centro di ciudad y duna esaki un bida nobo, hunto cu pacusnan, cafetarianan, restaurantnan y otro actividadnan pa logra e bida nobo aki; acomodacion y instalacion na San Nicolas di e energia hidro, importa for di Colombia; e desaroyo di y e guia pa empresanan mediano y chikito (“Midden- en Kleinbedrijf” – MKB), etc.
Pero atrobe lo siguiente ta keda aplicabel: esaki por ser logra solamente cu ministernan cu conocimento di e material (“Vakministers”), kendenan, mescos cu esaki ta sosode na Merca, ta wordo nombra pasobra nan ta e mihonan.
Tuma como ehempel e nombracionnan di Donald Trump; pa cada funcion e ta nombra e miho profesionalnan riba cada tereno!
Tanten cu Aruba ta sigui nombra como minister cierto rancadornan di voto incompetente y sin preparacion, Aruba lo no logra nunca!
NO cu un gobierno berde, pero tampoco cu un gobierno geel!

LOCUAL E PUEBLO NO KIER:
Ningun hende kier un prome minister cu ta culpa Hulanda di tur cos, y cu pa di tantisimo bes ta ofende prome minister di Hulanda Rutte abiertamente.
Den Amigoe Mike Eman ta skirbi: “Si Aruba kier keda forma parti di Reino, un “pakico” nobo mester ser crea; djey Mike ta continua y ta plantea cu desde cu Jan Peter Balkenende (di partido CDA) a “desaparece”, y Mark Rutte (di partido VVD) a haci su entrada, tur cos a sigui malo pa Aruba; Mike ta bisa tambe di ta spera riba un cambio di gobierno na Hulanda na Maart 2017; den otro palabra, Mike ta bisa cu e ora ey porfin ta di spera cu Rutte ta desaparece!
Esey ta cos di mal gusto, ademas peligroso.
Esey ta un indicacion cu Mike ta menasando cu un independencia total of cu un mancomunidad (“gemenebest”), y esey sigur no ta e deseo di Pueblo di Aruba!
Pueblo di Aruba tampoco tin ningun necesidad di “caranan nobo” manera un Michelle Steenvoorden-Lacle, kende ta kere cu Forza Nobo di Otmar Oduber te Ė solucion politico pa Aruba, y – segun e conocido sistema barata – ta trata na gana voto cu temanan, mesun barata, di campaña, promesanan pa un MAVO/HAVO/VWO na Noord, y otro promesanan relaciona cu supuesto derechonan di homo-sexualnan.
Ki asco! Otro fracaso di un futuro politico.
Ki dia hende ta siña cu algo asina no por, y no mag di sosode!

Hugo Kalkoen