Sra. Etlien Croes, director di Fundacion Papiamento, den un breve reseña a splica con e celebracion ta bay ta pa aña 2018 , cu a wordo decreta pa gobierno como aña oficial di idioma Papiamento.
Fundacion papiamento su funcion primordial lo ta pa crea consciencia na e pueblo di Aruba cu Papiamento ta nos lenga oficial y nos idioma nacional, pa conserv’e y manten’e. anto awor aki cu gobierno na declara cu aña 2018 lo ta aña oficial di papiamento, y esaki ta nifica cu ta bay tin diferente actividad pa conmemora e temporada aki.
Durante tur e eventonan carnavalesco por a mira cu tabata tin un slide educativo unda cu tabata tin mensahe diferente cu ta bisa cu papiamento ta e idioma oficial, e idioma nacional, pa nos conserbe y aprecia. Tambe ta bay tin un evento 21 di februari cu lo ta Dia Internacional di Lenga Materno, unda cu lo ta bay tin diferente charla, poesianan declama pa alumnonan di scol multilingual, exposicion di algun obra y un presentacion tocante e bon uzo di e idioma papiamento. Cu esaki fundacion papiamento lo kier invita pa stima papiamento como parti di nos, como nos simbolo nacional manera nos escudo himno y bandera, y cu ta di aplaudi si nos tur, sin importa nos descendencia, por balora tambe nos simbolo nacional tambe cu lo ta nos idioma.
Por ultimo, Sra. Etlien Croes director di Fundacion Papiamento a destaca cu den aña 2018 aki papiamento lo ta cumpli diescinco aña dia 22 di Mei, desde cu e la bira e idioma oficial na banda di idioma Hulandes, ta nifica cu tur habitante por skirbi un carta tanto na papiamento como na Hulandes, anto pa finalisa a expresa cu pa mantene pueblo uni, lo ta ideal pa e gobierno di pais stimula nan habitante nan pa respeta y balora e simbolonan nacional di un pais, cu ta idioma nacional,escudo himno y bandera y unda cu mester ta orguyoso di nan.