Pa di 5 biaha a organisa un anochi yama “Study Abroad” unda a duna informacion na e studiantenan interesa den bay studia na Merca of Canada. E anochi aki, segun Minister di Enseñansa, Michelle Hooyboer-Winklaar, tambe tabata pa duna extra informacion pa esunnan interesa den University of South Carolina (USC). Por a mira un sala completamente yen un biaha mas. E ultimo anochinan a conta entre 300 pa 500 persona hayando informacion.
E aplicacionnan pa loke ta Merca of Canada, pa aña ta den promedio di 25 cu 30. E aña aki a otorga 85 Aruba Lening pa studiantenan por studia na Merca of Canada. Casi tripel di e cantidad normal cu ta wordo procesa, e Minister a enfatisa. El a sigui bisa cu e interes ta hopi grandi. E opcion aki ta uno cu tog por logra y pesey a organisa e anochi aki pa por duna mas informacion posibel. “Na final di dia no ta solamente e escogencia na unda bo kier studia, obviamente e pais, cual ta e programa y na cual scol”.
Tin diferente decision cu mester tuma luga y entre mas informacion duna na e studiantenan y e mayornan, mas por ta convenci cu e decision eynan lo ta e miho pa nan. Tin hopi informacion pa un solo anochi. Pesey tabata tin mas anochi di informacion, Minister Hooyboer-Winklaar a indica.
Ta trata di un proceso y kier pa e studiantenan haci esaki mas tempran posibel pa por yega na e “deadlines” cu e universidadnan aki ta stipula. “Mas tempran bo cuminsa mas chens bo tin cu bo ta bay drenta na e scol cu bo ta desea pa ta”, e mandatario a enfatisa.
Durante e anochi aki e studiantenan mes a conta di nan experiencia pa medio di Skype. Tin informacion importante cu mester bin dilanti ora bo ta biba eynan manera vivienda, klasnan, evaluacion, etc. tin preguntanan riba e aspectonan aki y Minister Michelle Hooyboer-Winklaar ta hopi contento di por a mira un sala asina yen di studiantenan cu a presenta pa scucha e informacion.
“Nos ta spera cu esaki lo por trece cune un tiki mas guia, informacion y habri e porta pa posibilidad pa studiantenan cu kier studia Na Merca y Canada”.